Almatyda aýla komandalary arasynda shaǵyn fýtbol lıgasy ótedi
ALMATY. QazAqparat - Osy jeksenbide, 19 naýryz kúni, «Sporttyq Almaty» baǵdarlamasy aıasynda qalamyzda aýla komandalary arasynda shaǵyn fýtbol lıgasy ótedi, dep habarlady Almaty qalasynyń Dene shynyqtyrý jáne sport basqarmasynyń baspasóz qyzmetinen.
Fýtbol oıyndary Tımýr Segizbaev atyndaǵy alańda ótedi. Ol Gagarın kóshesi men Sı Sınhaı kóshesiniń qıylysynda ornalasqan. Jarysqa jasy segizden asqan kez kelgen bala qatysa alady.
Fýtbol básekesi tegin, eki sanat boıynsha ótedi. Birinshisi, «A» lıgasy - 8 jastan 14 jasqa deıin, ekinshisi, «B» lıgasy - 15 jastan joǵary. Reglament boıynsha ár komandanyń quramynda qatysýshylar sany segizden aspaý qajet, qaqpashyny qosa eseptegende alty nemese bes (alańǵa baılanysty) oıynshy oınaıdy.
«Oıyndar Almaty qalasy Dene shynyqtyrý jáne sport basqarmasynyń qoldaýymen ótkiziledi. Týrnırdiń basty maqsaty - alyp shahar jastarynyń sportqa degen qyzyǵýshylyǵyn arttyrý, sonymen qatar, Almaty turǵyndarynyń sportpen, fýtbolmen shuǵyldanýdy, salaýatty ómir saltyn ustanýǵa shaqyrý», - delingen habarlamada.
Eske sala ketsek, 2016 jyly osy lıga boıynsha alty saıys ótip, 2500-den asa adam jınalǵan.
Jeńimpazdar men júldegerler dıplomdar jáne medaldar tabystalady. Sonymen qatar, «Sporttyq Almaty» jobasy atynan kishigirim syılyqtar syıǵa beriledi. Al úzdik fýtbolshylar belgilengen nomınatsııalar boıynsha marapattalady.
