Almatyda aýla klýbynda tárbıelengen 400 bala jańa jyldyq merekege qatysty
ALMATY. QazAqparat - Almaty Depo Evolution Park loft-ortalyǵy aýla klýbtarynyń tárbıelenýshilerine jańa jyldyq mereke ótkizdi, dep habarlaıdy QazAqparat tilshisi.
Sharaǵa 400-ge jýyq bala qatysty.
Mereke Almaty qalasy Jastar saıasatyn damytý memlekettik qorynyń qoldaýymen uıymdastyryldy.
«Biz jasóspirimderdiń bos ýaqytyn uıymdastyrýmen aınalysamyz. Bizdiń ortalyq áleýmettik sıpatqa ıe. Áleýmettik jaǵdaıy tómen, ata-anasynyń qamqorlyǵynan aıyrylǵan balalarǵa kóp kóńil bólemiz», - dedi qalalyq Jastar saıasatyn damytý memlekettik qorynyń dırektory Alma Aýǵanbaeva.
Balalardyń kóńilin tapqyr Aldar Kóse, Jalmaýyz kempir, Mıkkı Maýs pen optımıst Olaf kóterdi.
«Men 8 jastamyn. Aýla klýbyna kelip júrgenime birneshe jyl boldy. Osy jerde qoıan-qoltyq jekpe-jek boıynsha sport sektsııasyna qatysamyn. Sonymen qatar, halyq bılerin bılegendi jaqsy kóremin. Búgingi shyrshada lezgınka bıin bıleımin», - dedi «Jas Dınamo» tárbıelenýshisi Ares Oganesıants.
Barlyq qatysýshylarǵa demeýshilerdiń atynan syılyqtar taratyldy.
Almaty boıynsha 5000 bala men jasóspirimniń tárbıesimen aınalysyp júrgen 40 aýla klýby bar. Onyń ishinde 12 klýb sport baǵytynda jumys isteıdi.
Aýǵanbaevanyń málimdeýinshe, barlyq balalar bos ýaqytynda paıdaly ispen aınalysady. Tárbıelenýshiler shyǵarmashylyqpen, qolónermen jáne sportpen shuǵyldanyp, jarystarda júldeli oryndarǵa qol jetkizip júr.
