Almatyda aýla aýmaǵyn kógaldandyrýǵa baıqaý jarııalandy
ALMATY. QazAqparat - Almatyda aýla aýmaǵyn kógaldandyrýǵa baıqaý jarııalandy, dep habarlaıdy QazAqparat tilshisi.
Almatyda qala kúnine oraı «Aýla aýmaǵyn úzdik kógaldandyrý – 2021» baıqaýy jarııalandy. Jeńimpazǵa aýlany kógaldandyrýǵa qajetti qural-jabydyq pen ósimdikter satyp alýǵa 5 000 000 teńge kóleminde sertıfıkat tabystalady.
Baıqaý aýlalardy abattandyrýǵa, kógaldandyrýǵa, turǵyndardyń áleýmettik belsendiligin arttyrýǵa baǵyttalǵan.
Oǵan turǵyndar, menshik ıesi uıymdary men páter ıeleri kooperatıvteri qatysa alady. Іs-shara aýlany kógaldandyrý jáne abattandyrý jumystaryna qala turǵyndarynyń nazaryn aýdarý maqsatynda uıymdastyryldy.
Jumystardy baǵalaý kezinde olardyń mádenı-estetıkalyq, tájirıbelik, jańashyldyq erekshelikterine nazar aýdarylady. Baıqaýǵa qatysý úshin www.ecovid.kz saıtynda tirkeýden ótip, ótinish qaldyrý qajet.
Marapattaý qala kúni – 19 qyrkúıekte ótedi.
