Almatyda aýqymdy dezınfektsııa júrgizilip jatyr
ALMATY. QazAqparat - Almatyda búgin 08:00-den bastap adam kóp jınalatyn qoǵamdyq oryndardy jappaı dezınfektsııalaý jumystary bastaldy, dep habarlaıdy QazAqparat tilshisi.
Demalys kúnderi mundaı jumystar keshki 18:00-ge deıin júrgiziletin bolady.
Eske sala keteıik, Almatyda karantındik sharalardyń kúsheıtilýine jáne saýda ortalyqtarynyń bazarlardyń, saıabaqtar men skverlerdiń, adamdar kóp jınalatyn oryndardyń jabylýyna baılanysty aǵymdaǵy jyldyń 20-21 maýsymynda koronavırýs ınfektsııasynyń taralýyna jol bermeý maqsatynda aýqymdy dezınfektsııalaý jumystaryn júrgizý josparlanǵan.
Jalpy, jospar boıynsha 494 nysan: Alataý aýdanyndaǵy 8 bazar, 11 saýda ortalyǵy, 4 skver;
Almaly aýdanyndaǵy 6 bazar, 29 saýda ortalyǵy, 47 sport nysany jáne fıtnes ortalyq, 1 saıabaq, 22 skver, 5 býlvar, 17 jasyl aımaq;
Áýezov aýdanyndaǵy 4 bazar, 32 saýda ortalyǵy, 30 fıtnes ortalyq, 1 saıabaq, 3 skver jáne 1 býlvar;
Bostandyq aýdanyndaǵy 31 saýda ortalyǵy, 59 sport nysany jáne fıtnes ortalyq, 4 saıabaq, 3 skver, 4 býlvar, 3 jaǵajaı;
Jetisý aýdanyndaǵy 16 bazar, 15 saýda ortalyǵy, 15 fıtnes ortalyq, 1 saıabaq;
Medeý aýdanyndaǵy 2 bazar, 19 saýda ortalyǵy, 31 fıtnes ortalyq, 2 saıabaq, 1 skver;
Naýryzbaı aýdanyndaǵy 3 bazar, 2 saýda ortalyǵy, 3 fıtnes ortalyq, 2 saıabaq, 1 skver;
Túrksib aýdanyndaǵy 6 bazar, 7 saýda ortalyǵy, 10 fıtnes ortalyq, 3 saıabaq, 11 skver, 1 jaǵajaı zararsyzdandyrylady.
«Almaty Tazalyq» MKK jáne aýdandardyń merdigerlik uıymdarynyń kúshimen kóshelerge, saıabaqtar men skverlerge, trotýarlarǵa, kóshe ýrnalary men oryndyqtarǵa, aıaldamalarǵa, bankomattarǵa, termınaldarǵa, jer asty jáne jer ústi ótpeli joldarǵa keń kólemdi dezınfektsııa júrgiziletin bolady.
Osy aýqymdy zalalsyzdandyrý jumystaryna 70 tehnıka jáne 150 adam jumyldyrylady. Dezınfektsııalyq óńdeý úshin adamdar men janýarlarǵa eshqandaı qaýip tóndirmeıtin 4-shi synypty qaýipsiz preparattar qoldanylady.
