Almatyda aýqatty otbasynyń balasyn óltirgen júrgizýshi sot barysynda qaıtys boldy
ALMATY. QazAqparat - Almaty qalasy Qylmystyq ister jónindegi mamandandyrylǵan aýdanaralyq sotynda adam óltirdi dep aıyptalyp otyrǵan kúdiktiniń ózi tergeý amaldary barysynda qaıtys boldy, dep habarlaıdy QazAqparat tilshisi.
10 shilde kúni atalǵan sotta QR QK 96-baby (kisi óltirý) boıynsha aıyptalyp otryǵan D.Nametovke qatysty qylmystyq is toqtatyldy.
Sottyń baspasóz qyzmetiniń habarlaýynsha, ol almatylyq otbasynda júrgizýshi bolyp qyzmet istegen. Qylmystyq oqıǵa jelisi 25 sáýirde bastalǵan.
Sol kúni ol jumys berýshiniń áıeli ekeýi «Qazaqstan» qonaqúıine baryp, otbasynyń uly Muqandy alyp ketpek bolǵan. Muqan 24 sáýirden 25 sáýirge qaraǵan túni atalǵan qonaqúıde araq iship, daý shyǵarǵan. Qonaqúıge barǵannan keıin Muqannyń anasy mán-jaıdy anyqtaý úshin ákimshilikke ketip, otbasy júrgizýshisi Nametovke balasy Muqandy kólikke otyrǵyzýyn suraǵan. Alaıda, Muqan kólikke otyrmaı, qonaqúıge qaıta kirip ketken. Nametovke baǵynbaı ekeýi birge 23 qabatqa kóterilgen. Muqan №9 júk jedelsatysyna qaraı baǵyt alady, al Nametov Muqandy lıft shahtasynan alyp ketpek bolǵan. Alaıda, sońǵysy oǵan baǵynbaı Nametovke birneshe soqqy jasaǵan. Osy jerde «ózin qorlady» dep sanaǵan Nametov Muqannyń jelke tusynynan birneshe soqqy jasap, júk tasymaldaıtyn jedelsatynyń ashyq shahtasyna ıterip jibergen. Shahtaǵa qulaǵan Muqan sol jerde mert boldy. Osydan keıin Nametov iske óziniń qatysyn jasyrý úshin jolaýshylar lıftisine qaraı ketip qalǵan.
Sotqa deıingi tergeý amaldary barysynda qaterli isik aýrýymen aýyratyn Nametovtiń ózi 22 maýsym kúni №12 qalalyq klınıkalyq emhanada kóz jumǵan.
«Osyǵan baılanysty, Nametovke qatysty 96 baptyń 1 tarmaǵy boıynsha qozǵalǵan qylmystyq is toqtatyldy», -dedi atalǵan sottyń baspasóz qyzmetinde.
