Almatyda Áýezov teatrynyń qasbetin jańartýdyń taǵy bir nusqasy qaraldy
ALMATY. QazAqparat - Almaty qalalyq josparlaý jáne ýrbanıstıka basqarmasynda Muhtar Áýezov atyndaǵy Qazaq memlekettik akademııalyq drama teatrynyń ǵımaratyn qaıta qalpyna keltirý máseleleri talqylandy, dep habarlaıdy QazAqparat tilshisi.
«Sáýletshi Berik Moljigittiń jobasy talqylandy, onda negizgi fasadtaǵy mármár plıtalardy áınek vıtrajdarymen almastyrý arqyly jańartý usynyldy. Sáýletshiniń aıtýynsha, ashyq vıtrajdar teatrdyń ishki álemin qala ortasymen baılanystyrýǵa múmkindik beredi. Vıtrajdardyń artynda teatr galereıasy teatrǵa kelgen almatylyqtardyń bos ýaqytyn ótkizetin jańa qoǵamdyq demalys orny retinde jumys isteıdi», delingen Qalalyq josparlaý jáne ýrbanıstıka basqarmasynyń jelidegi paraqshasyndaǵy jazbada.
Sonymen qatar, jobanyń alǵashqy avtory Oraz Baımyrzaev teatr ǵımaratynyń boı kótergenine jaqynda 50 jyl tolatynyn atap ótti.
«Usynylǵan nusqanyń konstrýktıvti kemshilikteri de bar. Vıtrajǵa aýystyrylatyn sektsııa uzyndyǵy 4,8 metr syrtqy fasadtyń konsolin kóterip tur. Meniń oıymsha, klassıkalyq teatrdyń ǵımaraty vıtrajsyz bolýy qajet, óıtkeni árqashan teatrdaǵy qımyl-qubylys qupııasy saqtalý kerek», - dedi ol.
Almaty qalalyq josparlaý jáne ýrbanıstıka basqarmasynyń basshysy Almashan Ahmetjanov usynylǵan vıtrajdary bar nusqa respýblıkalyq mańyzy bar tarıhı eskertkishtiń kelbetin buzatynyn aıtty.
«Joǵary tehnologııalyq materıaldardy qoldanyp, ǵımarattyń qasbetin bastapqy kelbetinde saqtaý kerek. Qasbetti qalpyna keltirýdiń basqa nusqalaryn da qarastyrý qajet», - dedi Almashan Ahmetjanov.
Aıta ketý kerek, 1 qarashada teatrdyń jańa kelbetine qatysty alǵashqy usynystan Qalalyq josparlaý jáne ýrbanıstıka basqarmasy bas tartty, Mundaı sheshim teatrdyń tarıhı beınesin saqtaý qajettigine baılanysty qabyldandy.
«Teatr ǵımaratynyń sáýlettik kelbeti tutastaı alǵanda saqtalýy tıis. Osyǵan baılanysty qoldanylatyn materıaldardyń kúndiz jáne túndegi kórinisin kórsete otyryp (3D túrlerin),túrli-tústi sheshimde qasbetterdiń basqa nusqasyn usyný qajet», - dep málim etti basqarmadaǵylar.
Aıta keteıik, Almaty qalalyq josparlaý jáne ýrbanıstıka basqarmasy teatrdy qaıta jańǵyrtý jobasyn ázirleýshimen jumys kezdesýin jalǵastyrady. Aýmaqty abattandyrý máseleleri jeke kezdesýde qabyldanatyn bolady, onyń qorytyndysy basqarmanyń resmı saıtynda jarııalanady.
