Almatyda Áýezov aýdany ákimdiginiń balalarǵa arnalǵan jańajyldyq shyrshasy ótti
ALMATY. 24 jeltoqsan. QazAqparat /Názıra Eleýhan/ - Búgin N. Sats atyndaǵy Memlekettik Akademııalyq balalar men jasóspirimderge arnalǵan orys teatrynda Almaty qalasy Áýezov aýdany ákimdiginiń uıymdastyrýymen aýdan balalaryna arnalǵan ákimniń jańajyldyq shyrshasy bolyp ótti.
Merekelik shyrshaǵa aýdandaǵy mektep ınternatynda tárbıelenýshi balalar, ár túrli sebeptermen ata-ana qamqorynsyz qalǵan balalar men áleýmettik jaǵdaıy nashar otbasylardyń balalary qatysty. Áýezov aýdanynyń ákimi Bekqalı Torǵaev balalardy kele jatqan Jańa jyl merekesimen quttyqtap: «Árqashan aspandaryń ashyq, kóńilderiń shat bolsyn. Úzdik oqyp, ata-analaryńnyń maqtanyshy bolyńdar.Táýelsiz memleketimizdiń ónegeli, úlken azamaty bolyp ósińder. «Atańnyń balasy bolma, adamnyń balasy bol» dep danalarymyz aıtqandaı, elimizdi kórkeıtip, halyqqa qyzmet kórseter úlken er azamat bolyńdar!»,-dedi.
Kontserttik baǵdarlamada ertegi keıipkerler óz ónerlerin kórsetip, balalar shyrshany aınala án aıtyp, bı bıledi. Aıaz Ata men Aqshaqar ákelgen syılyqtaryn tabystady. Shyrsha balalarǵa arnalǵan jańajyldyq qoıylym kórsetilimimen aıaqtaldy.
