Almatyda áýejaıǵa «jarylǵysh zat qoıǵan» er adam ustaldy
ALMATY. QazAqparat – Almaty halyqaralyq áýejaıynda adamdar evakýatsııalandy – áýejaıǵa mına qoıylǵany týraly aqparat tústi, dep habarlaıdy QazAqparat tilshisi.
«Búgin, 10 aqpanda, 102 shuǵyl baılanys jelisine 17 saǵat 52 mınýtta belgisiz bireýden qońyraý kelip tústi. Er adam Almaty halyqaralyq áýejaıyna mına qoıylǵanyn aıtqan. Bul aqparat dereý Kóliktegi polıtsııa departamentiniń bólimshelerine habarlandy. Áýejaıdaǵy adamdar evakýatsııalanyp, nysan qorshaýǵa alyndy. Qońyraý shalýshynyń kim ekenin anyqtaý jumystary da júrgizildi. Bul 1997 jyly týǵan B. degen azamat bolyp shyqty. Qazir ony Patrýldik polıtsııa polkiniń qyzmetkerleri ustap, Almaly aýdanynyń polıtsııa bólimine alyp ketti», - dep habarlady polıtsııa.
Bul adamnyń qalalyq psıhonevrologııalyq dıspanserde tirkeýde turǵany anyqtaldy. Buryn ol osyǵan uqsas áreketteri úshin qylmystyq jaýapqa tartylǵan.
«Bul fakt QR Qylmystyq kodeksiniń 273-baby boıynsha sotqa deıingi tergep-tekserýdiń biryńǵaı tiziliminde tirkeldi», - dedi Almaty qalasy PD Jedel basqarý ortalyǵynyń basshysy, polıtsııa polkovnıgi Andreı Kvashnın.
«Áýejaıǵa jarylǵysh zat qoıylǵany týraly aqparat rastalǵan joq. Qalalyq jedel-izdestirý jumystary aıaqtaldy. Dúrligip, alańdaýǵa negiz joq», - dep naqtylady polıtsııadan.
Avtor: Danııar Daýtalıev
