Almatyda áýejaı men qoǵamdyq oryndarda baqylaý kúsheıtildi
ALMATY. QazAqparat – Almatyda áýejaı men qoǵamdyq oryndarda baqylaý kúsheıtildi, dep habarlaıdy QazAqparat tilshisi.
Álemdegi epıdemııalyq jaǵdaıdyń nasharlaýyn eskere otyryp, Almaty qalasynda koronavırýs ınfektsııasynyń yqtımal ekinshi tolqynyna daıyndyqty qamtamasyz etý boıynsha keshendi sharalar iske asyrylýda.
Koronavırýs ınfektsııasynyń taralýyn boldyrmaý úshin Almaty qalasynyń Halyqaralyq áýejaıynda shetelden keletin azamattarǵa turaqty túrde monıtorıng júrgiziledi. Maqsaty – ushyp kelgender azamattarda koronavırýs ınfektsııasyna testiden ótkeni jónindegi anyqtamanyń bar-joǵyn anyqtaý jáne sáıkes dıagnostıkany júrgizý úshin jedel oqshaýlaý.
«Osy jyldyń 12-13 qazany aralyǵynda shetelden Almaty qalasyna 1456 jolaýshysy bar 11 áýe reısi keldi. 207 jolaýshynyń anyqtamasy joq bolyp shyqty. COVID-19-ǵa test tapsyrǵany týraly anyqtamasy joq jolaýshylardyń bári qonaqúıler janynan qurylǵan karantındik statsıonarlarǵa koronavırýs ınfektsııasyna laboratorııalyq tekserý júrgizý úshin oqshaýlandyryldy»,– delingen qalalyq ákimdik taratqan aqparatta.
Óz kezeginde, juqtyrýdy boldyrmaý maqsatynda qala aýmaǵynda karantın sharalarynyń buzylý faktilerin anyqtaýǵa jáne qaýipsizdiktiń sanıtarlyq-epıdemııalyq talaptarynyń odan ary oryndalýyn qamtamasyz etýge baǵyttalǵan 26 monıtorıngilik top jumys istep jatyr.
«Sonymen qatar, 12-13 qazan kúnderi karantın talaptarynyń saqtalýy boıynsha 243 tekserý sharalary júrgizildi. 27 nysanda tártip buzýshylyqtar anyqtaldy, maska rejımin buzǵany úshin QR ÁQBtK-niń 425-babynyń 1-tarmaǵy boıynsha 5 jeke tulǵa ákimshilik jaýapkershilikke tartyldy»,– dep atap ótti ákimdik.
Sondaı-aq, Almaty qalasynyń bas memlekettik sanıtar dárigeriniń qaýlysyndaǵy talaptardy buzǵan nysandar anyqtaldy.
Olardyń ishinde: Maqataev kóshesi, 53 mekenjaıyndaǵy (Medeý aýdany) «Shans» bıngo klýby, Rozybakıev kóshesi, 49 mekenjaıyndaǵy (Bostandyq aýdany) «Sansabıl» dámhanasy, Bókeıhanov kóshesi, 44 A mekenjaıyndaǵy «King Beer Halal Burgers» dámhanasy, Fedorov kóshesi, 24 mekenjaıyndaǵy (Jetisý aýdany) «Lýna» dámhanasy, 6 shaǵyn aýdandaǵy 3B úı mekenjaıyndaǵy «Dýel» kompterlik klýby, 6 shaǵyn aýdandaǵy 11 úı mekenjaıyndaǵy (Áýezov aýdany) «Monstr» kompıýterlik klýby bar.
