Almatyda áýesqoılar «Meteor» jarysynda jeńil atletıkadan ózara baq synasty
ASTANA. QazAqparat - Búgin Almaty Arena stadıonynda Qazaqstanda alǵash ret «Meteor» atty júgirý jobasy iske qosyldy. Áýesqoılar 400 m, 800 m, 1500 m nemese 3000 m qashyqtyqtarda jáne 4-te 400 estafetasynda nemese aralas komandalar quramyndaǵy «Shved Estafetasynda» baq synasty, dep habarlaıdy QazAqparat aqparattyq sport habine silteme jasap.
«Men 3 km jáne 800 metrdi júgirip óttim, eki qashyqtyqta da birinshi bolyp márege jettim. Jaqsy nátıje kórsettim dep oılaımyn. Osy sport túri ózime jaqyn, júgirgendi unatamyn. Jasym 36-da, alty balanyń ákesimin. Menińshe, mundaı sporttyq sharaǵa barlyǵy qatysý kerek. Aýa-raıy qolaıly, kóńil-kúı keremet, jaqsy áser aldym», - dep bólisti jarys qatysýshysy Raýan Ábilhanov.
«Meteor» sporttyq sharasy qala turǵyndaryn negizgi júgirý túrlerimen shuǵyldanýdy nasıhattaý, osy sport túrine qyzyqtyrý, sondaı-aq, áýesqoılardyń júgirýden sheberlikterin arttyrý maqsatynda uıymdastyrylady.
Jarysqa 14 jastan joǵary 150-ge jýyq áýesqoı sportshylar qatysty. Olar jeke jáne komandalyq estafetalarda básekege tústi. «Meteor» qysqa jáne ortasha qashyqtyqtarda kásibı júgirýden sporttyq daıyndyqty synaýǵa múmkindik beredi.
«Búgin jeńil atletıkadan kásibı qashyqtyqtarda áýesqoılar jarys jolyna shyqty. Sóreden márege deıin barlyǵy halyqaralyq erejelerge sáıkes ótti. Qatysýshylardy kásibı tóreshiler baǵalady. Biz bul sharany jylyna úsh ret uıymdastyrýdy josparlaýdamyz. Áýesqoılar arasyndaǵy jarys bolǵandyqtan, barlyǵy nátıjege jumys isteıdi. Kelesi sharany jabyq manejde ótkizýge múmkindik bolyp jatsa qańtarda ótkizemiz, bolmasa, sáýir aıynda osy stadıonda kezdesetin bolamyz», - dep bólisti jeńil atletıka Federatsııasynyń ókili jáne «Meteor» jobasynyń koordınatory Natalıa Popova.
Jeńimpazdar men júldegerler dıplom jáne medaldarmen marapattaldy, sondaı-aq, kelesi jarysqa tegin qatysýǵa múmkindik aldy.
Atalmysh shara Almaty qalasynyń jeńil atletka Federatsııasy, «Ekstremaldy atletıka» qoǵamdyq birlestigi men Almaty qalasy dene shynyqtyrý jáne sport basqarmasynyń qoldaýymen ótkizildi.
