Almatyda áýe apatynan zardap shekkender jansaqtaý bóliminen palataǵa aýystyryldy
ALMATY. QazAqparat – Áýe apatynda jaraqat alǵan UQK qyzmetkerleriniń jaǵdaıy turaqty. Olar jansaqtaý bóliminen palataǵa aýystyryldy, dep habarlaıdy QazAqparat tilshisi.
Bul týraly №4 qalalyq klınıkalyq aýrýhananyń bas dárigeri Saǵı Beısenbekov málim etti.
«Eki naýqastyń da jaǵdaıy turaqty. Olar reanımatsııadan mamandandyrylǵan bólimge aýystyryldy. Palatada em alady», - dedi №4 qalalyq klınıkalyq aýrýhananyń bas dárigeri Saǵı Beısenbekov.
Eske sala keteıik, 13 naýryz kúni Nur-Sultan-Almaty baǵytynda kele jatqan AN-26 áskerı ushaǵy 17.22 kezinde radardan joǵalyp, qala áýejaıy mańynda apatqa ushyraǵan edi.
Ushaqta bolǵan 4 adam qaza tapty. 2 adam túrli jaraqatpen Almaty qalasynyń №4 qalalyq klınıkalyq aýrýhanasyna jetkizildi.
Keıinnen Almaty dárigerleri ushaq apatynan japa shekken eki adamnyń densaýlyǵy qalaı ekenin aıtty.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblıkasy Ulttyq qaýipsizdik komıteti Almatyda apatqa ushyraǵan ushaqtyń qara jáshigindegi derekter tekserilip jatqanyn málim etti.
