Almatyda aýdandyq kóshi-qon polıtsııasynyń eks-basshysy sottaldy
ALMATY. QazAqparat - Almatyda Almaly aýdandyq kóshi-qon polıtsııasynyń burynǵy basshysy Talǵat Arǵynbekov sottaldy, dep habarlaıdy QazAqparat tilshisi qalalyq sottyń baspasóz qyzmetine silteme jasap.
Іs materıaldaryna sáıkes, laýazymdy tulǵa óziniń sybaılastarymen birlese otyryp sheteldik azamattardyń eńbek kúshin zańsyz paıdalanǵandarǵa kómek kórsetip kelgen.
Oǵan QR QK 262-babynyń 3-bóligimen (uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý), 366-babynyń 4-bóligimen (para alý), 361-babynyń 2-bóligimen (laýazymdyq ókilettikterdi teris paıdalaný) aıyp taǵyldy.
T.Arǵynbekov 2016 jyldyń naýryz-qarasha aralyǵynda M.Hanmen aldyn ala ymyralasa otyryp shet el azamattarynyń zańsyz eńbek qyzmetine qorǵanshylyǵy úshin 2 836 200 teńge para alǵandyǵy anyqtalǵan. Al M.Han deldaldyq qyzmet kórsetken.
Almaty qalasynda ornalasqan «Bazılık» ashanasynyń basshysy A.Gordııýk laýazymdy tulǵaǵa jalpy somasy 1 500 000 teńge bolatyn para bergen.
Sot úkimimen T.Arǵynbekov múlki tárkilene otyryp, 11 jylǵa bas bostandyǵynan aıryldy. Sondaı-aq sot onyń polıtsııa podpolkovnıgi sheninen aıyrdy.
M.Han QR QK 28-babynyń 5-bóligimen, 366-babynyń 3-bóligi 2, 4-tarmaqtarymen múlki tárkilene otyryp, 8 jylǵa bas bostandyǵynan aıyrý jazasy taǵaıyndalǵan.
Sot «Qazaqstan Respýblıkasynyń Táýelsizdigine 25 jyl tolýyna baılanysty raqymshylyq jasaý týraly» QR Zańynyń 4-baby 2-tarmaǵyna sáıkes sottalǵan T.Arǵynbekovke ótelmegen jaza bóligin qysqartylyp, oǵan túpkilikti 8 jyl 2 aı merzimge, al M.Hanǵa 6 jyl merzimge bas bostandyǵynan aıyrý túrindegi jaza taǵaıyndaldy. Sottalýshylarǵa jazalaryn orta qaýipsizdik júıesiniń qylmystyq-atqarý mekemelerinde óteý belgilendi.
Al, kásipker A.Gordııýkke QR QK-niń 367-babynyń 2-bóligimen múlki tárkilenip, paranyń otyz eselengen somasy mólsherinde aıyppul 45 000 000 teńge tóleıtin boldy.
Sot úkimi zańdy kúshine enbegen.
