Almatyda aýdandardyń ınfraqurylymyn ózgertýde turǵyndar pikiri eskeriledi

ALMATY. QazAqparat - Qala ákimi Baqytjan Saǵyntaev Túrksib aýdany ákiminiń turǵyndar aldyndaǵy esep berý kezdesýine qatysty, dep habarlaıdy QazAqparat tilshisi.Aýdan ákimi Baqytjan Aqjarov buǵan deıingi kezdesýlerde aıtylǵan jáne áleýmettik jelilerde jarııalanǵan máseleler men ótinishterdiń qalaı júzege asyrylyp jatqanyn baıandady.

Aýdandaǵy eń ózekti máselelerdiń biri – kommýnaldyq ınfraqurylym. Mysaly, 25 myń jeke úıdiń 24 myńǵa jýyǵy gazben qamtamasyz etildi. Qalǵan 929 úıge magıstraldy jeli tartyldy. Búginde 625 úıge ishki júıelerdi qosý jáne montajdaý jumystary júrgizilip jatyr.

Ortalyq sýmen jabdyqtaý jáne káriz júıesine qosylý máselesi de ózektiligin joımaı tur. 20 myńǵa jýyq úıdiń sý burý júıesi bolmasa, 3 myńnan astam úı sý júıesine qosylmaǵan. Osy máseleni sheshý baǵytyndaǵy «Qaırat» pen «Álmerek» yqshamaýdandarynda júrip jatqan ınjenerlik jelilerdiń qurylysy aıaqtalýǵa jaqyn, al «Nurshashqan» aýdanynda jalǵasýda. Bul jumystar aýdannyń 10 myńǵa jýyq turǵynyn qamtyǵan 2400 úıdi ortalyq kommýnıkatsııamen qamtamasyz etýge múmkindik beredi. Qalǵan úıler boıynsha qujattar daıyndalyp jatyr.

Jıynda sóz alǵan «Álmerek», «Qaırat», «Nurshashqan» yqshamaýdandary men «Avıator» baý-baqsha qoǵamynyń turǵyndary jaryqtyń tarıfi qymbattaǵanyn aıtyp, onyń jıi óshetinine shaǵymdandy. Qala ákiminiń tapsyrmasy boıynsha ıesiz jatqan jelilerdi «AJK» AQ-nyń balansyna berý jumystary júrgizilýde. Jumystar 2020 jyldyń shilde aıynda aıaqtalady. Sonymen qatar, jyl sońyna deıin uzyndyǵy 134 shaqyrym bolatyn 254 kósheniń syrtqy jaryqtandyrý jelileri júrgiziledi.

Budan ózge Maılın, B. Hmelnıtskıı kóshesi, Súıinbaı men Rysqulov, Seıfýllın dańǵyldarynyń boıynda jańǵyrtý jumystary júrgizilip, 2 myńnan astam únemdi jańa jaryq núkteleri ornatyldy. Bıyl Qapshaǵaı kópiri men Jansúgirov kóshesindegi shamdardy jańǵyrtý josparlanǵan. Aýdan aýmaǵynda 569 aýla bar, onyń 400 aýlasy jańǵyrtyldy. 2020 jyly taǵy 103 aýlany abattandyrý josparlanýda. Qalǵan 66 aýla jóndeýge jaramsyz. Sebebi 26-sy jańa yqshamaýdandar bolsa, 40-y «eski turǵyn úı» sanatyna jatqyzylǵan. Aýdan ákimi Baqytjan Aqjarovtyń málimetinshe, bıyl 36 kóshede (27 km astam) joldardy ortasha jóndeý jáne 17 kóshede (12 km) trotýarlar salý josparlanǵan. Buǵan deıin uzyndyǵy 5,5 shaqyrymnan astam 15 kóshege ortasha jóndeý jumystary júrgizildi.

Kezdesýde Shahar basshysy Baqytjan Saǵyntaev mektepter, úıler jáne áleýmettik nysandardyń janynda jaıaý júrginshiler jolynyń bolmaýyna shaǵymdanǵan turǵyndardyń barlyq usynystaryn jınaqtaýdy tapsyrdy.

«Aýdandarda baǵdarshamdardy ornatý, jaıaý júrginshiler ótkelderin retke keltirý, sport alańdary men trotýarlar salý boıynsha júrgizilip jatqan barlyq jumystardy turǵyndardyń tilekterin eskere otyryp túzetý qajet. Turǵyndar neniń jaqsy jáne neniń qajet ekenin jaqsy biledi», – dedi Baqytjan Saǵyntaev.