Almatyda aýdan ákimi halyqpen kezdesýdi turǵyn úı aýlasynda ótkizdi
Partııa fılıaly jergilikti halyqpen kezdesýlerdi kókeıkesti máseleler ýshyǵyp turǵan oryndarda ótkizýdi dástúrge aınaldyrǵan.
Kezekti kezdesýlerdiń biri aýdan turǵyndarynyń aýlalarynda ótti. Partııa fılıalynyń tóraǵasy "Temir", "Elına", "Lokomotıv" úsh páter ıeleri kooperatıviniń (PIK) múshelerin tyńdady.
Turǵyndar aýdan ákimine jyldar boıy sheshilmeı kele jatqan problemalaryn aıtyp keldi.
Kópqabatty úıler irgesindegi aýmaqty abattandyrý jumysy, PIK problemalary, kóptegen kóshelerdiń jóndeý qajettiligi, qoǵamdyq kóliktiń qozǵalysy jáne basqa da máseleler kezdesý barysynda talqylandy.
"Azamattardy kóshpeli qabyldaý men úshin óte paıdaly. Sebebi aýdandaǵy qalyptasqan jaǵdaıdy kórip, obektileri baqylaýǵa alamyn. Turǵyndardyń óz aýzynan kóptegen máselelerdi estımin" - dedi Muhtar Tájibaev.
Turǵyndardyń jekelegen máseleler boıynsha shaǵymy sol kúni-aq oń sheshimin tapty. Máselen qoqys jáne jol máselesi sol kúni sheshildi.
Ákim aýdannyń keıbir jekelegen qyzmetteri qala turǵyndarynyń ótinishterine salǵyrt qaraıtynyn atap ótti.
Kóshpeli qabyldaý barysynda Jetisý aýdandyq partııa fılıaly tóraǵasynyń birinshi orynbasary Erlan Álbısenov, Jetisý aýdanynyń prokýratýra qyzmetkerleri, turǵyn úı-kommýnaldyq sharýashylyǵy men jergilikti ózin-ózi basqarý komıtetiniń, ІІB, MPS qyzmetteri, ókilderi qatysty.
Sondaı-aq qabyldaý barysynda aýdan turǵyndaryna Elbasy Joldaýynyń "Rýhanı jańǵyrý" negizgi basymdyqtary túsindirildi.
Aıta ketý kerek, Memleket basshysy 2016 jyly 8 aqpanda ortalyq atqarýshy organdar basshylarynyń, ákimderdiń, ulttyq joǵary oqý oryndary rektorlarynyń halyqqa esep berý kezdesýlerin ótkizý týraly Jarlyqqa qol qoıǵan bolatyn.
«Barlyq deńgeıdegi ákimder jyl saıyn, birinshi toqsan ishinde halyqqa esep berý kezdesýlerin ótkizsin, olardyń barysynda elde iske asyrylyp jatqan reformalar, tıisti ákimshilik-aýmaqtyq birliktiń ótken jyldaǵy áleýmettik-ekonomıkalyq damýy, aýmaqtardy damytý baǵdarlamalarynyń túıindi kórsetkishterine qol jetkizý, ony ári damytýdyń mindetteri men negizgi baǵyttary, óńirdiń áleýmettik-ekonomıkalyq damý basymdyqtaryn aıqyndaý bóliginde jergilikti bıýdjetterdiń jobalaryn qalyptastyrý protsesi týraly habardar etsin»,- delingen bolatyn jarlyqta.
