Almatyda aýa tazalyǵyn baqylaıtyn qoǵamdyq qor quryldy
ALMATY. QazAqparat –Almatydaǵy aýa tazalyǵyn baqylaýmen aınalysatyn «AAirVision.kz qoǵamdyq qory qurdy, dep habarlaıdy QazAqparat tilshisi.
Qordyń quryltaıshylary Berik Qanıev pen Alekseı Nı qaladaǵy aýa basseınin birneshe jyl ishinde tazartýdy qolǵa alyp otyr.
Ol úshin qoǵamdyq qor memlekettik organdarmen, azamattyq sektormen, qazaqstandyq jáne sheteldik ǵalymdarmen birge jumys istemek.
«Qazir almatylyqtar úshin eń basty problema - aýa tazalyǵy. Bizdiń qor qoǵamdyq belsendiler, ǵalymdar, ınjenerler, ekologııa boıynsha sarapshylar, bul problemanyń ortaq sheshimin tapsa deımiz. Bizdiń uıym kommertsııalyq emes. Bizdiń maqsatymyz qalamyzdy barlyǵymyz úshin qaýipsiz etý», - dedi Berik Qanıev.
Qor quryltaıshylary bul qorǵa barlyq ekologııa mamandaryn tartqysy keledi.
«Osy jerden ortaq strategııa qurylsa dep oılaımyz. Osy taqyrypta semınarlar, konferentsııalar ótkizsek. Zań shyǵarý protsesterine qatysyp otyrýǵa nıettimiz. Bul uıym ákimdik pen halyq arasyndaǵy altyn kópir bolmaq. Munda ekologııalyq monıtorıng júrgiziledi. Halyqtyń ekologııalyq bilimin arttyryp, el arasynda ekologııalyq máselelerdi nasıhattaýdy basty maqsat etip otyrmyz», - dedi qor quryltaıshylary.
Eń alǵashqy qadam retinde zamanaýı monıtorıng júıesin jasaý uıǵaryldy. Bul júıe Dúnıejúzilik densaýlyq saqtaý uıymy ruqsat bergen ádistemelerdiń negizinde jasalady.
Eske salsaq, buǵan deıin Almaty ákimdigi qalada 517 myńnan astam kólik tirkelgenin habarlaǵan edi. Odan bólek, kún saıyn qalaǵa 250 myńǵa jýyq kólik kiredi. Sondyqtan da qala atmosferasyna shyǵarylatyn zııandy zattardyń deńgeıi joǵary.
Sondaı-aq,Ekologııa, geologııa jáne tabıǵı resýrstar mınıstri Maǵzum Myrzaǵalıev Almaty aýasynyń lastanýy boıynsha málimdeme jasady.
