Almatyda aýa sapasyn jaqsartý úshin qandaı sharalar qolǵa alynady
Almaty qalasy máslıhatynyń ekologııa, týrızm jáne qoǵamdyq keńistikti damytý jónindegi turaqty komıssııa qorshaǵan ortanyń jaǵdaıy men atmosferalyq aýanyń sapasyn baǵalap, taldaý júrgizdi.
«Taldaý kórsetkendeı, azamattardyń basym bóligi, sonyń ishinde balalar, jasóspirimder jáne zeınet jasyndaǵy adamdar tynys alý organdarynyń aýrýymen aýyrady. Bul aýadaǵy zııandy zattardyń joǵary kontsentratsııasyna baılanysty. Kólik - lastanýdyń negizgi emıtentteriniń biri», - dedi Almaty qalasy máslıhatynyń ekologııa, týrızm jáne qoǵamdyq keńistikti damytý jónindegi turaqty komıssııasynyń tóraǵasy Altynaı Kóbeeva.
Onyń aıtýynsha, qorshaǵan ortany jaqsartý máseleleri Almatynyń 2025 jylǵa deıingi damý baǵdarlamasyna engizilgen.
Onyń ishine JEO-2 joǵary tıimdi súzgilerdi ornatýdy eskere otyryp gazǵa aýystyrý, q alada elektr avtobýstary sanynyń kezeń-kezeńimen kóbeıtý, óndiristik lastaýshy kásiporyndardyń ekologııalyq monıtorınginiń avtomattandyrylǵan júıesin engizý sııaqty sharalar kirdi.
«Almatynyń aýasy las ekeni eshkimge qupııa emes. Negizgi sebep - kólik quraldary, jylý elektr stantsııalary, qatty turmystyq qaldyqtar nemese janatyn zattar. Árıne, bul másele ekologtardy ǵana emes, azamattarymyzdy jáne búkil qoǵamdy alańdatady. Qazir aýa basseınindegi las zattardyń 60%-yn kólikten shyǵatyn shyǵaryndylar quraıdy. Mysaly, bir avtomobıl aýaǵa 200 lastaýshy zatty, onyń ishinde kómirtegi oksıdi, aldegıdter, kúıe, azot oksıdterin bóledi eken», - dep tolyqtyrdy depýtat.
Qoǵamdyq tyńdaý qorytyndysy boıynsha, qalalyq mobıldilik basqarmasyna shyǵaryndylar standartyna sáıkes kelmeıtin kólik quraldarynyń qozǵalysyn shekteý boıynsha shara qabyldaý usynyldy.
Basqa memlekettik organdardyń málimetter bazasymen ıntegratsııalaý arqyly qalaǵa kire beristegi ekologııalyq posttardyń jumys protsesin ońtaılandyrý, shyǵarylym normalaryna sáıkes kelmeıtin kólikterdiń qalaǵa kirýine jol bermeý kerektigi aıtyldy.
