Almatyda aýa sapasyn baǵalaýǵa arnalǵan ekologııalyq beketter jetispeıdi - «Qazgıdromet» basshysy

ALMATY. QazAqparat - Almatyda aýa sapasyn baǵalaýǵa arnalǵan ekologııalyq beketter jetispeıdi. Bul týraly búgin Almaty ákimdiginde qala ekologııasy máselesine arnalǵan otyrysta «Qazgıdromet» RMK bas dırektory Aıbek Meńdiǵarın málim etti. Otyrysqa Almaty ákimi Baýyrjan Baıbek jáne QR Energetıka mınıstri Qanat Bozymbaev qatysty.

Óz sózinde A. Meńdiǵarın «Qazgıdromet» RMK Almaty fılıaly  aýa sapasyna 16 statsıonarlyq beket arqyly monıtorıng jasalatyndyǵyn aıtty. Olardyń ishinde 11 beket avtomatty túrde, al qalǵan 5 beket qolmen basqarylady.       

Ólsheý jumystary táýligine 3-4 ret júrgiziledi. Keıin fılıaldyń zerthanalarynda saraptama jasalady.

Monıtorıng qalanyń Naýryzbaı aýdanynan basqa aýdandardyń  barlyǵyn qamtıdy.  

Sonymen qatar, jyljymaly zerthananyń kómegimen de qalanyń belgilengen 10 núktesinde monıtorıng júrgiziledi. Alynǵan aqparattardyń barlyǵy óńdelip, resmı saıtta aı saıynǵy bıýlletende jarııalanady.

«2014 jyly «Qazgıdromet» aýa sapasyn baǵalaýdyń jańa júıesin engizdi. Bul ádisteme aýanyń lastaný deńgeıi boıynsha shynaıy derekter alýǵa múmkindik beredi. Qazirgi tańda sol ádistemeniń derekterine súıensek, Almaty qalasynyń aýasy joǵary dárejede lastanǵan. Standarttyq kórsetkishi - 3,1», - dedi A. Meńdiǵarın.  

Sonymen qatar, «Qazgıdromet» basshysy sóz sońynda qalada ekologııalyq beketterdiń jetispeı jatqandyǵyn atap ótti.

«Almatyda 1,7 mln. adam turady. Aǵymdaǵy normaǵa sáıkes, 50 myń adamǵa 1 ekologııalyq beketten keledi. ıAǵnı, Almatydaǵy aýa sapasyna shynaıy baǵa berý úshin 33 ekologııalyq beket qajet. Al bizde bar bolǵany 16 beket bar. Onyń ózinde 5 beket qolmen basqarylady. Sol úshin bizge qosymsha beketter óte qajet», - dedi ol.