Almatyda atys bolyp, er adam aıaǵynan jaraqattandy
ALMATY. QazAqparat – Almatyda bireýler atysyp, er adam aıaǵynan jaralandy, dep habarlaıdy QazAqparat tilshisi.
Oqys oqıǵa keshe keshki saǵat 21:00 shamasynda Qazybek bı –Muqanov kósheleriniń qıylysynda bolǵan.
Oqıǵa kýágerleriniń aıtýynsha, kompıýterlik tehnıka satatyn dúkenniń qasynda bireýler atysqan. Sonyń kesirinen er adam aıaǵynan jaralanǵan.
«Men dúken aralap júrgen edim. Kenet syrtta 3 ret oq atyldy. Jaralanǵan er adamnyń áıeli shuǵyl jedel járdem shaqyryp jatty. Atysqan adamdar bir-birimen tanys pa ol jaǵyn bilmeımin», - dedi oqıǵany kýágeri Gúlzat Rymbaeva.
Qalalyq polıtsııa departamenti bul oqıǵaǵa qatysty túsinik berdi.
«Jumalıev kóshesinde ornalasqan dámhanalardyń birinde otyrǵan eki adam sózge kelip qalǵan. Onyń arty janjalǵa ulasyp, olardyń biri 37 jastaǵy jigitke pyshaq salǵan. Sol sátte ekinshisi travmatıkalyq tapansha alyp oq atqan. Oqtyń biri kóshemen ótip bara jatqan 28 jastaǵy jigittiń aıaǵyna tıgen. Qazir tóbeleske qatysqandar ustaldy. Bul derek boıynsha QR QK 293-babynyń 3-bólimimen tergeý amaldary bastaldy», - dedi PD baspasóz qyzmetinen.
