Almatyda aty ańyzǵa aınalǵan Panfılov dıvızııasynyń 70 jyldyǵyna arnalǵan patrıottyq aktsııa ótti
ALMATY. 13 shilde. QazAqparat /Názıra Eleýhan/ - Almatydaǵy 28 gvardııalyq panfılovshylar atyndaǵy saıabaqta 316-shy (8 gvardııalyq) atqyshtar dıvızııasynyń qurylǵanyna 70 jyl tolýyna oraı «Panfılov dıvızııasynyń kúni» atty memorıaldyq patrıottyq aktsııa ótti.
«Aqparattyq bastama» korporatıvtik qorynyń uıymdastyrýymen ótken sharaǵa QR Qorǵanys mınıstrliginiń ókilderi, Uly Otan soǵysynyń ardagerleri, jergilikti atqarýshy organdarynyń ókilderi, Reseı jáne Qyrǵyz Respýblıkalary elshilikteriniń bas konsýldary, reseılik, qazaqstandyq jáne qyrǵyz qoǵamdyq uıymdary men jastar birlestikteri, sonymen qatar, panfılovshy-jaýyngerlerdiń týǵan-týystary men nemereleri qatysty.
Aktsııaǵa qatysýshylar Dańq memorıalyna, Baýyrjan Momyshuly eskertkishterine, 28 panfılovshy-jaýyngerlerdiń ataýly belgilerine gúlshoqtaryn qoıyp, aspanǵa - «Keńes Odaǵynyń Batyry» ataǵyna ıe bolǵan jaýyngerlerdiń sany boıynsha - 37 áýe sharlaryn jiberdi.
Sharanyń saltanatty bóliminde sóz sóılegen QR Eńbek sińirgen qaıratkeri, polkovnık, professor, Reseı Áskerı akademııasynyń korrespondent-múshesi Kım Serikbaev qazaqstandyq batyrlardyń Máskeýdi qorǵaý barysynda kórsetken erligi men batyldyǵyn eske saldy. Ardager sonymen qatar, barlyq tarıhshylardy Uly Otan soǵysyndaǵy tarıhı faktilerdi burmalamaýǵa shaqyrdy.
«Panfılovshy -jaýyngerlerdiń erligi - Otanǵa degen ártúrli ult adamdarynyń sheksiz mahabbatynyń mysaly bola alady. Uly Otan soǵysy jyldary dıvızııa quramynda KSRO-dan 36 ult ókilderi soǵysty, olardyń ishinde qazaqtar, orystar, ýkraındyqtar, qyrǵyzdar, evreıler, belarýstar jáne basqa ult ókilderi boldy. Sondyqtan, Panfılov dıvızııasynyń tarıhı mysalyn negizge ala otyryp qazaqstandyq patrıottyq rýhty tárbıeleý kerek»,-deıdi aktsııanyń uıymdastyrýshysy, «Aqparattyq bastama» korporatıvtik qorynyń dırektory Mıhaıl Tıýnın.
Onyń aıtýynsha, aldaǵy ýaqytta panfılovshy-jaýyngerlerdiń qaharmandyq tarıhyna arnalǵan kóptegen sharalar, aktsııalar men dóńgelek ústelder uıymdastyrylatyn bolady.
Memorıaldyq aktsııa «Panfılovshy-jaýyngerlerdi eske ala otyryp» atty dóńgelek ústel otyrysymen jalǵasty. Oǵan áskerı qyzmetkerler, ardagerler, general Panfılovtyń týysqandary men qoǵamdyq uıymdardyń ókilderi qatysýda.
316-shy atqyshtar dıvızııasy Almaty qalasynda 1941 jyldyń shilde-tamyzynda qurylǵan bolatyn. Dıvızııanyń jeke qurylymy Almaty qalasy, Almaty oblysy, Qazaqstannyń basqa da aımaqtary jáne qyrǵyz eliniń áskerı mindetti turǵyndarynan jasaqtaldy. 1941 jyldyń qazan-qarashasynda Máskeýdi qorǵaý barysynda kórsetken erlik pen batyldyǵy úshin dıvızııaǵa 8-shi gvardııalyq atqyshtar dıvızııasy aty berildi, al keıinirekte dıvızııaǵa 1941 jyldyń 18 qarashasynda Máskeý oblysynyń Volokolamsk qalasynyń tusynda qaza tapqan, dıvızııanyń tuńǵysh komandıri Ivan Vasılevıch Panfılovtyń aty berildi. Panfılovshy jaýyngerler Pskov oblysyn, Latvııany, Lıtvany nemis-fashısttik jaýlap alýshylarynan qorǵaýǵa qatysty. Panfılov dıvızııasy Lenın ordenimen, ekinshi dárejeli Sývorov ordenimen marapattaldy.
