Almatyda «Atılla» men «Ólimniń» arasynda aralas jekpe-jekten qarymta kezdesý ótedi
ALMATY. 28 tamyz. QazAqparat - Almatyda jeltoqsan aıynda Balýan Sholaq atyndaǵy sport saraıynda «MMA» aralas jekpek-jeginen Tólegen Aqylbekov (Atılla) pen Aleksandr Emelıanenko (Ólim) arasynda qarymta kezdesý ótedi.
Ol Qazaqstan Respýblıkasynyń Táýelsizdik kúnine oraılastyrylyp otyr. Ony «Alash pride» klýbynyń jetekshileri búgin Almatyda ótkizgen baspasóz máslıhatynda málimdedi.
Qazaqstannyń «Alash pride» pen Reseıdiń «A.E team» klýbtarynyń bul sańlaqtary arasyndaǵy alǵashqy jekpe-jek 2011 jyldyń jeltoqsanynda ótken. Onda áskerı sambodan 1999 jylǵy Eýropa jáne 2003, 2005, 2006 jylǵy Álem chempıony A. Emelıanenko tájirıbesi áli tolyspaǵan erkin kúres boıynsha jastar arasyndaǵy Álem chempıonatynyń fınalısi T. Aqylbekovti aýyrtý ádisimen qapy qaldyrǵan edi. Bul jeńilisten aşy sabaq alǵan «Atılla» bıyl 8 maýsymda Astanadaǵy «Saryarqa» velotreginde QR Prezıdentiniń kýbogy úshin MMA halyqaralyq aralas jekpe-jek týrnırinde boıy 2 metr 5 sm, salmaǵy 170 keli bolatyn «Qanypezer qubyjyq» degen laqap aty bar amerıkandyq Bob Sappen jekpe-jek ótkizip, ózinen 43 keli salmaq aıyrmasy bar qarsylasyn bet qaratpaı utqan bolatyn. Tólegen qazirgi tańda «WKF» nusqasyndaǵy aralas MMA jekpe-jeginiń Álem chempıonatynyń júldegeri, «Bushido FC 51» nusqasyndaǵy aralas MMA jekpe-jegi boıynsha QR Prezıdenti júldesiniń jeńimpazy. Ol endi qarashanyń basynda Lıtvanyń Vılnıýs qalasynda bolatyn "Bushido FC Hero's" Álem chempıonatyna, al aıdyń sońynda Anglııanyń London qalasynda ótetin "Bushido FC 53" Álemdik chempıonatyna qatyspaq.
