Almatyda ataýy ózgergen kóshelerge qazaq handarynyń esimderi berildi
ALMATY. QazAqparat - VI shaqyrylǵan Almaty qalalyq máslıhatynyń kezekten tys XXXIV sessııasynda 183 kósheniń jańa ataýy maquldandy. Kóshelerdiń birine Ózbekstannyń tuńǵysh prezıdenti Islam Karımovtyń esimi berildi, dep habarlaıdy QazAqparat tilshisi Almaty ákimdiginiń baspasóz qyzmetine silteme jasap.
Aty ózgertilgen 183 kósheniń 20-syna: Kereı-Jánibek handar, Táýke han, Esim han, Ábish Kekilbaıuly, Pol Gýrde, Shamǵon Qajyǵalıev, Farıda Sháripova, Jaıaý Musa, Vasılıı Bartold sekildi tulǵalardyń attary berilgen. Qalǵan 163 kóshege Jeti jarǵy, Ata tolǵaýy, Aqjaınaq, Taıbýryl, Álqıssa, Arlan, Aqbozat sekildi tarıhı-geografııalyq jáne ulttyq tanym ataýlary berilgen.
Kóshelerdiń ataýyn ózgertý jumysy 2018 jyldyń basynda, turǵyndardyń shaǵymdaryna baılanysty bastalǵan bolatyn. Aty joq kósheler, attary qaıtalanatyn kósheler turǵyndarǵa qıyndyq týdyrǵan, ásirese jedel járdem men órt sóndirýshilerdi shaqyrý kezinde bul erekshe baıqalatyn.
Almatyda shamamen 2,5 myń kóshe bar. Sonyń 349-ynyń aty qaıtalanatyn. Atap aıtqanda, qalada, jańadan qosylǵan aýmaqtardy qosa alǵanda, Abaı atynda 12 kóshe, 3 Áýezov kóshesi, 13 Jambyl Jabaev kóshesi, 6 Qurmanǵazy kóshesi, 5 Tóle bı kóshesi, 3 Qazybek bı, 3 Áıteke bı, 8 Raıymbek batyr, 4 Naýryzbaı batyr, 8 Qarasaı batyr, 4 Baıtursynov, 5 Seıfýllın, 6 Moldaǵulova, taǵy alty Mámetova kóshesi bolatyn.
Avtor: Albert Ahmetov
