Almatyda ataýsyz qansha kóshe bar
ASTANA. QazAqparat - Búgin Ortalyq kommýnıkatsııalar qyzmetindegi brıfıngte Almaty ákimi Baýyrjan Baıbek qaladaǵy kóshe ataýlarynyń jıi ózgerýine qatysty pikir bildirdi, dep habarlaıdy QazAqparat tilshisi.
«Almaty qalasynyń aýmaǵy 2 ese ulǵaıyp, búginde 700 sharshy shaqyrymdy qurady. Almaty oblysynan 2 aýdan bizge qosyldy. Qatelespesem, búginde qalada 3 myń kóshe bar. Onyń shamamen 250-iniń ataýy qaıtalansa, 200 kóshede ataý joq», - dedi ol BAQ ókilderiniń saýalyna oraı.
Ákim dereginshe, qalada Abaı atynda 13, Jambyl atynda 12 kóshe bar. Buǵan qosa, Alǵabas aýdanynyń ataýy 5 ret qaıtalanady.
«Ózderińiz de oılap kórińizder, turyp jatqan jerlerińizge jedel járdem, polıtsııa, tipti qonaq shaqyrsańyz da olar taba almaıdy. Bul múldem qolaısyz. Osyǵan baılanysty bizge shaǵym da kóp túsedi», - dedi qala basshysy.
Sonymen qatar ol Elbasynyń tapsyrmasyna sáıkes negizinen kóshelerge geografııalyq ataýlar beriletindigin basa aıtty. Degenmen, qalaǵa, Qazaqstanǵa eńbegi sińgen azamattardyń esimi berilýi múmkin ekendigin joqqa shyǵarmady.
«Máselen, Saǵadat Nurmaǵanbetov nemese taıaýda ǵana aıyrylyp qalǵan Talǵat Bıgeldınov, Belger. Aıtalyq, kóshege Batyrhan Shúkenovtiń esimin berdik. ıAǵnı, bular ulttyq aýqymdaǵy adamdar jáne Almaty qalasynda jumys istegen», - dedi Baýyrjan Baıbek.
