Almatyda atasy nemeresin soqqyǵa jyqqan vıdeo jelide tarap ketti
Beınekadrda tósekte jatqan balany aıaýsyz soqqylaǵan er adamdy kórýge bolady. Bala janushyra kómekke shaqyrady.
Almaty Polıtsııa departamenti baspasóz qyzmetiniń málimetinshe, oqıǵa 15 aqpanda bolǵan. Alaıda, balanyń anasynan shaǵym Túrksib aýdandyq polıtsııa basqarmasyna 6 naýryzda túsken. Áıeldiń aıtýynsha, ákesi 10 jastaǵy nemeresin soqqyǵa jyqqan.
«Oqıǵa bolǵan mekenjaıǵa aýdandyq ýchaske ınspektory jáne ıývenaldy polıtsııa basqarmasynyń otbasylyq qorlyq-zombylyqtan áıel quqyǵyn qorǵaý bólimshesinen qurylǵan tergeý-jedel toby bardy. Balaǵa qol kótergen er adam qalalyq narkologııalyq dıspanserde yrqynan tys em alyp júrgen»,-dedi Almaty PD resmı ókili Saltanat Ázirbek.
Atalǵan derek boıynsha er adamǵa qatysty Ákimshilik quqyq buzýshylyqtar Kodeksiniń 73 babynyń 1 bólimi boıynsha (soǵý nemese ózge de kúsh kórsetý áreketteri, dene jaraqatyn salý, densaýlyǵyna qater tóndirmegen) sotqa deıingi tergeý isi tirkeldi.
Balanyń dene jaraqaty deńgeıin anyqtaý úshin sot medıtsınalyq saraptama taǵaıyndaldy.
«Saraptama nátıjesi boıynsha bala jeńil jaraqat alǵan.
Qazirgi ýaqytta barlyq materıal Almaty aýdanaralyq ákimshilik sotynyń qaraýynda»,- dedi Saltanat Ázirbek.
Sondaı-aq, nekeden ajyrasqan áıel kámeletke tolmaǵan úsh balasymen birge áke-sheshesiniń úıinde turatyny belgili boldy. Ata-anasymen otbasynda kıkiljiń paıda bolǵan. Qazirgi tańda áıel balalarymen Almaty oblysyndaǵy týystaryna ketken.