Almatyda ataqty sýretshi Alekseı Ýtkınniń qala kúnine arnaǵan «Meniń súıikti qalam» atty kórmesi ashyldy

Qala kúnine oraı, arnaıy ashylǵan kórmege sýretshiniń Almaty qalasy týraly salynǵan týyndylary qoıylǵan. Alekseı Ýtkın óz kartınalarynda atalarymyz ben ájelerimizdiń ǵana esinde saqtalǵan, búgingi bizder kýágeri bolyp úlgergen, biraq, aldyńǵy urpaqqa alys ta beımálim bolyp kórinetin búgingi Almaty qalasynyń qaıtalanbas kórinisterin beınelegen.

Alekseı Ýtkınniń shyǵarmashylyǵynda qalanyń ár turǵyny úshin ystyq ta, qymbat tarıhı oryndar beınelengen panoramalar úlken oryn alady. Kartınalarda búgingi alyp megapolıstiń dınamıkasy men qarbalasýy Almatynyń burynǵy kórinisteri - eski alań, opera teatry, sýburqaqtar, taý ańǵaryna deıin sozylǵan keń dańǵyldary men eski ortalyqtyń tynysh kósheleri kórsetilgen. Sýretshi jumystaryndaǵy áserli, júrekke jyly tıetin ómirge degen kózqaras kórermendi erekshe baýlap, eshkimdi nemquraıly qaldyrmaıdy.

Alekseı Ýtkınniń esimi Qazaqstan sýretshileri men beıneleý óneri sheberleri arasynda óte tanymal. Óziniń shyǵarmashylyq jolynda sýretshi qalaǵa tán erekshelikterin, dástúrin, sıpatyn saqtaı otyryp «súıikti qalasynyń portretin» jazýmen aınalysyp keledi. Sýretshi kompozıtsııalary emotsııalyq tús qanyqtyǵy men kolorıttik názik sezimmen erekshelenedi.

Búginde sýretshiniń jumystary Qazaqstan, Reseı, AQSh, Italııa, Týrtsııa, Ispanııa, Frantsııa jáne Nıderlandııa jeke menshik kollektsııalarynda saqtaýly.

Alekseı Ýtkın 1949 jyly Altaı óńirinde dúnıege kelgen. 1974 jyly estý qabileti tómenderge arnalǵan Lenıngrad kórkem-sýret tehnıkýmyn, 1985 jyly Almaty Memlekettik teatr jáne kórkem-sýret ınstıtýtyn aıaqtady. 1985-1995 jj. Almaty qalasyndaǵy estý qabileti tómen balalarǵa arnalǵan № 1 mektepte sýret sabaǵynan dáris berdi. 1987 jyldan Qazaqstan sýretshiler Odaǵynyń múshesi; 1995 jyldan «Qazaqstan Respýblıkasyndaǵy estý qabileti tómen sýretshiler assotsıatsııasy» Memlekettik beıkommertsııalyq qoǵamdyq birlestiginiń prezıdenti qyzmetin atqarýda.