Almatyda Ata Zań tarıhyna arnalǵan kórme ashyldy
Kórmege QR Ulttyq kitaphanasynyń qorynan 1500-ge jýyq basylym qoıyldy. Onda Táýke hannyń tusynda qabyldanǵan «Jeti jarǵy», qazaq halqynyń dástúrli ádep-ǵuryp zańdarynyń jınaǵy: memleket tarıhy men quqyǵy týraly ádebıetter usynyldy. «Mádenı-mura» memlekettik baǵdarlamasy aıasynda jarııalanǵan «Qazaqtyń ata zańdary» qujattar men materıaldar jınaǵy da bar.
«Sonymen qatar, tanymal zańger, otandyq zań ǵylymynyń damýyna, quqyqtyq memlekettiń qalyptasýyna, táýelsiz elimizdiń órkendeýine aıtarlyqtaı úles qosyp, zań ǵylymynyń barlyq salalary boıynsha zertteýler men monografııalar jazǵan S.Zımanov, S.Sartaev, Q.Mamı, I.Rogov, S.Sabıkenov, T.Kúltóleev, Ǵ.Saparǵalıev, G.Taımanov, Á.Erenov, S.Baısalov, Sh.Shaıbekov, N.Muhıddınov, S.Sahıpov, M.Baımahanov, M.Súleımenov, M.Nárikbaev, Ý.Jekebaev, T.Aǵdarbekov, Q.Halıqov, S.Tabanov, N.Óseruly, Z.Kenjálı, S.Ózbekuly, A.Ibraeva jáne taǵy basqa zań ǵylymy men biliminiń damýyna aıryqsha serpin bergen zııaly tulǵalar basylymdaryna erekshe oryn berilgen»,- deıdi QR Ulttyq kitaphana qyzmetkeri Janar Ábdikerimova.
Onyń aıtýynsha, Konstıtýtsııa Qazaqstan halqyna eń bastysy - tańdaý quqyǵyn berdi.
«Ata Zań – bizdiń kúndelikti júris-turysymyzdy retteıtin, qaýipsizdigimizdi qamtamasyz etip, el bolashaǵynyń jarqyn bolýy úshin qoǵamdaǵy kelisim men tártipti saqtaıtyn eń mańyzdy qujat. Memleketimizdiń damýyna úles qosqysy keletin azamat sol qujatqa moıynsunyp, ony qurmettemeıinshe, eldiń damýyn oılaý múmkin emes. Árbir azamat ony qadirlep- qasterleýge, ardaq tutýǵa mindetti»,- deıdi ol.
