Almatyda «Asyl mura» qalalyq án-bı baıqaýy ótedi
ALMATY. Aqpannyń 26-sy. QazAqparat /Názıra Eleýhan/ - Almatyda Oqýshylar saraıynda naýryz aıynyń 1-i men 4-i aralyǵynda «Asyl mura» halyqtyq dástúrli án jáne jeke aspapta oryndaýshylardyń І-shi qalalyq án-bı baıqaýy ótedi,
dep habarlaıdy QazAqparat.
Baıqaýdyń maqsaty - halqymyzdyń asyl-murasy - dástúrli án men kúılerin dáripteý, sal-seriler esimin este saqtap, ánderin jas urpaqqa nasıhattaý, qazaq halqynyń ulttyq bıleriniń sheber oryndalýyna jáne damýyna yqpal jasaý, sondaı-aq balalardyń kórkem shyǵarmashylyǵynyń damýyna kómek kórsetý jáne nasıhattap, járdem etý, ulttyq mádenıetti, halyqtyq sal-dástúrdi saqtaý, qolónerdi qurmettep, jandandyrý bolyp tabylady.
Án-bı baıqaýy Almaty qalasy ákimdigi, «Nur Otan» HDP-sy, «Jas Otan» Jastar qanaty atqarýshy hatshylyǵy janynan qurylǵan «Zańǵar» shyǵarmashylyq birlestigi, bilim, mádenıet basqarmalary, Almaly aýdany ákimdigi jáne «Aıman» stýdııasynyń uıymdastyrýymen ótedi.
Baıqaý dástúrli án, ulttyq aspapta oınaý, horeografııa, qazaq qolóneri atalymdary boıynsha uıymdastyrylyp, qatysýshylardyń ónerin kompozıtor, aqyn, ánshi, horeograf, óner qaıratkerlerinen turatyn ádilqazylar alqasy baǵalaıtyn bolady.
Jeńimpazdar baǵaly syılyqtarmen jáne dıplomdarmen marapattalady. Sondaı-aq eń basty júldeli oryndarǵa ıe bolǵandar bıylǵy jyly naýryz aıynyń 23-28-i aralyǵynda ótetin respýblıkalyq «Ǵumyrdarııa» án-bı baıqaýyna qatysady.
