Almatyda astyrtyn oıyn avtomattar zalynyń qyzmetin uıymdastyrǵan Malı Respýblıkasynyń azamaty jaýapqa tartyldy
ASTANA. Shildeniń 15-i. QazAqparat /Rýslan Ǵabbasov/ - Zańsyz oıyn mekemeleriniń Almaty qalasynda shoǵyrlanǵandyǵy rastaldy.
Bul týraly búgin Astanada QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili (qarjy polıtsııasy) Murat Jumanbaı málim etti.
«Qarjy polıtsııasy organdarynyń statıstıkasy zańsyz oıyn mekemeleriniń Almaty qalasynda shoǵyrlanǵandyǵyn rastaıdy. Jyldyń basynan osy qalada zańsyz qyzmet atqarǵan 7 kazıno jáne 25 oıyn avtomattary zaly anyqtaldy»,- dedi resmı ókil búgingi brıfıng barysynda.
Almatyda astyrtyn oıyn avtomattar zalynyń qyzmetin uıymdastyrǵan Malı Respýblıkasynyń azamaty Kangaba Kýlıkoro qylmystyq jaýapqa tartyldy. 3 elektrondyq jáne 2 «orys» rýletkasy, 59 oıyn avtomaty jáne 400 myń teńge tárkilendi.
«Elordamyzda da zańsyz oıyn mekemeleri kóptep anyqtaldy. Birinshi jartyjyldyq ishinde Astanada 24 astyrtyn oıyn mekemesiniń qyzmeti áshkerelenip, 285 oıyn avtomaty, 12 stol jáne 10 rýletka tárkilendi»,- dedi ol.
Astana qalasynda 9 oıyn avtomattary zalynan jáne 2 kazınodan quralǵan zańsyz oıyn mekmeleriniń jelisin uıymdastyrǵan aǵaıyndy 2 azamat sotqa tapsyryldy. Atalǵan zańsyz mekemelerdi tekserý kezinde 16 mln.teńge, 174 oıyn avtomaty, karta oıynyna arnalǵan 5 stol jáne 6 elektrondyq rýletka tárkilendi. 152 mln. teńge somasynda tapqan zańsyz tabysty aǵaıyndylar avtomobıl jáne Astanada 4 páter satyp alý jolymen zańdastyrǵan. Satyp alynǵan páterlerdiń birinde lombard qyzmeti uıymdastyrylǵan.
