Almatyda «Astyq» JShS azyq-túlik qoımalarynyń órt shalǵan aýmaǵy 410 sharshy metrdi qurady
ALMATY. QazAqparat - Búgin Almaty qalasynyń Jetisý aýdanyndaǵy Bókeıhanov kóshesi boıynda ornalasqan «Gaz montaj» JShS aýmaǵynda ornalasqan azyq-túlik qoımalarynan órt shyqty. Bul týraly alǵashqy habar 101 kezekshi bólimine 12 saǵat 51 mınýtta kelip tústi, dep habarlaıdy Almaty qalalyq tótenshe jaǵdaılar jónindegi departamentiniń baspasóz qyzmetinen.
Órt sóndirýshiler oqıǵa ornyna 12 saǵat 58 mınýtta kelip jetken. Belgili bolǵanyndaı, bul qoımalardy «Astyq» JShS áleýmettik mańyzy bar azyq-túlikterdi qoıý úshin jalǵa alǵan eken. Órttiń aýmaǵy 410 sharshy metr jerdi qurady. Tilsiz jaý 13 saǵat 41 mınýtta aýyzdyqtalyp, 15 saǵat 48 mınýtta tolyǵymen sóndirildi. Ony joıýǵa 19 arnaıy tehnıka men 8 qosymsha tehnıka jáne jeke quramnan 98 adam jumyldyryldy. Abyroı bolǵanda, adam shyǵyny joq. Tilsiz jaý qoımalardyń muzdatqysh qondyrǵylaryna jetkizilmeı óshirilgen.
Qazir órttiń oryn alý sebepteri men órtenip ketken azyq-túliktiń kólemi jáne baǵasy anyqtalý ústinde.
