Almatyda «Astra Consulting agensy» qarjy pıramıdasynyń qyzmetkerleri ustaldy
Almaty qalalyq Polıtsııa departamentiniń málimetinshe, atalǵan kompanııanyń basshylyǵy men qyzmetkerlerine qatysty alǵashqy aryz polıtsııaǵa 2019 jyldyń jeltoqsan aıynda túsken. Búgingi kúni zardap shekkenderdiń resmı sany – 124 adam.
«Azamattardy aqsha salýǵa tartý jáne aı saıynǵy devıdentterdi tóleýge ýáde berý boıynsha birqatar alaıaqtyq is-áreketterdi jasady degen kúdikpen kompanııanyń alty qyzmetkeri ustalyp, qamaýǵa alyndy. Onyń jetekshisi halyqaralyq izdeýge jarııalandy. Kúdiktilerdiń is-áreketteri QR QK-niń 217-baby 3-bóligi (Qarjylyq pıramıda) boıynsha kvalıfıkatsııalanǵan. 124 salymshyǵa keltirilgen materıaldyq shyǵynnyń jalpy somasy 6,2 mln teńge», – dedi Almaty qalalyq Polıtsııa departamenti bastyǵynyń orynbasary Rústem Ábdrahmanov.
Onyń aıtýynsha, sotqa deıingi tergep-tekserýdi PD tergeý basqarmasy júrgizedi.
«Zańsyz áreketterdiń basqa qatysýshylaryn, sondaı-aq jábirlenýshilerdi anyqtaý jumystary jalǵasýda. Osyǵan baılanysty biz joǵaryda atalǵan kompanııa ókilderiniń qylmystyq áreketterinen zardap shekken azamattardy tergeýshige myna telefon nómiri 8-701-732-86-54 arqyly baılanysýǵa nemese Almaty qalasy, Masanchı kóshesi 55 úıge kelip resmı ótinish jazýǵa shaqyramyz», – dedi Rústem Ábdrahmanov.