Almatyda Astananyń týǵan kúnine oraı birqatar nysandar ashyldy
ALMATY. QazAqparat - Búgin Almatyda Astana qalasynyń týǵan kúnine oraı, balabaqsha men álemdik brendtegi qonaq úı paıdalanýǵa berildi. Olardyń ashylý saltanatyna qala ákimi Baýyrjan Baıbek qatysty.
Megapolıstiń Áýezov aýdanynda ornalasqan ári memlekettik-jekeshelik áriptestik aıasynda salynǵan balabaqshanyń jalpy kólemi - 1,6 myń sharshy metrdi quraıdy. Qala basshysy bul nysannyń áleýmettik mańyzdylyǵyn erekshe atap ótti. Aýdannyń halyq tyǵyz ornalasqan aýmaǵynda boı kótergen bul balabaqsha alǵashqy kezde 180 baldyrǵandy qabyldaıdy. Keıinirek balalardy qabyldaý jumysy odan ári jalǵasatyn bolady. Mektep jasyna deıingi jańa mekemeniń ashylýy arqasynda 45 jumys orny ashyldy. Munda 25 pedagog sábılerge úsh tilde - qazaq, orys jáne aǵylshyn tilderinde dáris beretin bolady.
Al, «Balapan» baǵdarlamasynyń arqasynda ár sábıge ketetin shyǵynnyń bir bóligin memleket tóleıdi. Bul ata-analar úshin úlken jeńildik ekeni sózsiz.
Dál osy kúni ákim kólemi - 15 myń sharshy metr bolatyn, 190 nómiri bar álemdik brendtegi 4 juldyzdy «Shera Park Inn» qonaq úıiniń ashylýyna qatysty. Nysan Medeý aýdanynda ornalasqan. Ákim mundaı qonaq úılerdiń qajet ári mańyzdy ekendigin atap ótti. Jańa qonaq úıdiń arqasynda turaqty 80 jumys orny ashyldy. Mundaı meımanhanalardyń kóp salynýy qonaq úı bıznesinde básekelestikti qalyptastyryp, «Ýnıversıada - 2017» syndy halyqaralyq jarystar kezinde qalanyń bedelin arttyra túsedi. Almaty qalasy ákimi baspasóz qyzmetiniń habarlaýynsha, qonaq úı qurylysynda otandyq kásiporyndardyń materıaldary keńinen paıdalanylǵan.
Aıta ketelik, Almatyda shaǵyn jáne orta bıznestiń úlesi arta túsýde. Búgingi tańda ońtústik astanada barlyǵy 185 000 shaǵyn jáne orta bıznes nysandary tirkelgen. Olarda 580 000-nan astam adam jumys isteıdi. Ótken jyly shaǵyn jáne orta bıznes sýbektileri 4,2 trln. teńgeniń ónimin shyǵardy. 2014 jyldyń osy kezeńimen salystyrǵanda ósim - 21,1 paıyzdy qurady.
