Almatyda astana kúnine oraı jańartylǵan saýda oryndary ashyldy

ALMATY. QazAqparat- QR Táýelsizdiginiń 30 jyldyǵy men elordanyń týǵan kúnine oraı megapolıste jańartylǵan saýda oryndary ashyldy, dep habarlaıdy QazAqparat tilshisi.

Almaly aýdanynda jańartylǵan «Kárim» bazarynda 76 jańa jumys ornyn ashý josparlanyp otyr, onyń jalpy aýdany 20 000 sharshy metr. Bazarda ártúrli taýar bar. Saýda oryndarynyń sany 400, ınvestıtsııa somasy - 300 mln teńge.

Jetisý aýdanyndaǵy «Rahat» bazarynyń jalpy aýdany 20 000 sharshy metr, bazarda bolashaqta 600 jumys orny ashylmaq. Bazarda kıimnen bastap balyq aýlaýǵa qajetti taýarlardyń barlyǵy satylady. Saýda oryndarynyń sany 600, ınvestıtsııa somasy - 2 mlrd teńge.

Altynnan jasalǵan buıymdar, kıimder men túrli taýardy Jetisý aýdanyndaǵy jańa «Alataý-1» bazarynyń 4 blogynan tabýǵa bolady. Jalpy aýdany 10 000 sharshy metr, saýda oryndarynyń sany 400, ınvestıtsııa somasy - 800 mln teńge.

Jetisý aýdanyndaǵy «Keremet» bazarynyń jalpy aýdany 16 000 sharshy metr bolady, ol 400 adamdy jumyspen qamtymaq. Jobaǵa 300 mln teńge ınvestıtsııa tartyldy.

Sondaı-aq, elorda kúnine oraı Almaty qalada bes iri saýda jáne oıyn-saýyq kesheni ashylmaq.

Sonymen qatar, qazir 10 bazarda qurylys jumystary júrip jatyr, 6 bazardyń jobasy daıyndalýda. Investıtsııalardyń jalpy somasy 17 mlrd teńgeden asady, ol 1,5 myń jańa jumys ornyn ashýǵa múmkindik beredi.

Búgingi tańda qalanyń jumys istep turǵan 52 bazardyń 23-inde jańartý jumystary júrdi, oǵan 20 mlrd teńgege jýyq ınvestıtsııa salynyp, 2,4 myń adamdy jumyspen qamtydy.

Osy jyldyń sońyna deıin «Qazyna» (1 kezeń) jáne «Arlan» (1 kezeń) bazarlaryndaǵy jańartý jumystary tolyǵymen aıaqtalyp, paıdalanýǵa berilmek.