Almatyda astana kúnine oraı jańa ónerkásip oryndary ashyldy

ALMATY. QazAqparat- QR Táýelsizdiginiń 30 jyldyǵy men elorda kúnine oraı Almaty qalasynyń ındýstrıaldy aımaǵynda jańa úsh ónerkásip orny ashyldy, dep habarlaıdy Qazaqparat tilshisi.

«Rahat SK» men «G.S.G. Vysotnık» JShS avtoklavty gazbeton óndirý zaýyttary áleýmettik jáne kommertsııalyq turǵyn úıdiń iri qurylys kompanııalaryn sapaly qurylys materıaldarymen qamtamasyz etedi.

Ónimderdi shyǵarýda memlekettik standarttarǵa sáıkes jergilikti shıkizat qoldanylady.

Zaýyt óndirisiniń 1 kezeńiniń qurylysyna 1,5 mlrd teńge ınvestıtsııa salyndy. Kásiporyn jylyna 180 myń tekshe metr ónim shyǵarýdy josparlap otyr.

Sondaı-aq, 40 jańa jumys orny ashylady. Ekinshi seriktestiktiń ınvestıtsııa somasy 1,7 mlrd teńgeden asty.

Óndiris qýaty jylyna 100-120 myń tekshe metrden astam ónim shyǵarady jáne 85 jańa jumys orny ashylady.

Elorda kúnine oraı «ADS industries» JShS óndiris parkiniń birinshi kezeńi iske qosyldy. «ADS industries» JShS Almaty qalasynyń ákimi B. Saǵyntaevtyń tapsyrmasymen «Almaty Business-2025» óńirlik baǵdarlamasyna qatysýshysy.

Kompanııa óndiristik parktiń qurylysyna shamamen 150 mln teńge ınvestıtsııa quıdy.

Birinshi kezeńde 1, 5 myń sharshy metr engizildi, onda jeńil, metall óńdeý jáne jıhaz ónerkásibin óndirýshi shaǵyn jáne orta kásipkerliktiń alty sýbektisi ashylady.

Óndiristik parktiń jalpy alańy - 4,5 myń sharshy metr, onda 160 jańa jumys orny ashylady.

Eske salsaq, osy jyldyń birinshi toqsanynda ındýstrıaldy aımaqta qýaty jylyna 25 000 tonnadan astam ónim shyǵaratyn ári 80 adamdy jumyspen qamtyǵan mys jáne alıýmınıı symyn shyǵaratyn zaýyt ashylǵan bolatyn.

Joba quny – 11,3 mlrd teńge.

Bıyl aımaqta 7 ónerkásip ornyn ashý kózdelgen. Onyń jalpy somasy 37,8 mlrd teńge jáne 658 adamdy jumyspen qamtıdy.

Búginde 16 joba iske asýda. Jalpy somasy - 78,2 mlrd teńge. 2,5 myńǵa jýyq adamdy jumyspen qamtyǵan.