Almatyda astana kúnine oraı birneshe bilim mekemesi paıdalanýǵa berildi

ALMATY. QazAqparat - Almatyda astana kúnine oraı 725 oryndy eki mekteptiń jańa korpýsy, 120 oryndy tórt memlekettik balabaqsha, sondaı-aq birneshe jekemenshik bilim berý mekemesi paıdalanýǵa berildi, dep habarlaıdy QazAqparat tilshisi.

Almatyda orta bilimniń qoljetimdiligin qamtamasyz etý úshin qala ákimi Baqytjan Saǵyntaevtyń tapsyrmasy boıynsha memlekettik jáne jekemenshik mektepterdiń qurylysy júrgizilýde.

Sondaı-aq jumys istep turǵan bilim berý nysandaryna jańa korpýstar salynyp, birneshe mekemede seısmıkalyq sharalar kúsheıtildi. Bul jyl sońyna deıin 21 myńnan astam jańa oqý ornyn ashýǵa múmkindik beredi.

Astana kúnine oraı Bostandyq aýdany «Orbıta-1» yqshamaýdanynda 600 oryndy №60 gımnazııa ǵımaratynyń jańa korpýsy ashyldy.

Gımnazııada keńeıtýdiń arqasynda qosymsha kabınetter paıda boldy jáne eki aýysymdy oqytý máselesi sheshiledi.

Alataý aýdanynda jumys istep turǵan №166 lıtseıge 125 oryndy jańa qosymsha ǵımarat salyndy. Sóıtip, oqýshy orny 485-ke jetti.

Sonymen qatar, megapolıste Astana kúnine oraı eki jekemenshik mektep ashyldy. Olar, Bostandyq aýdany «Baǵanashyl» yqshamaýdanynda 60 oryndy «COSMO PRIMARY SHOOL» bastaýysh mektebi jáne qalanyń Áýezov aýdanynda 130 oryndy «AVS School» jeke mektebi paılanýǵa berildi.

Almatyda qala ákimi Baqytjan Saǵyntaevtyń tapsyrmasy boıynsha balabaqshadaǵy oryn tapshylyǵyn tómendetý boıynsha júıeli jumystar júrgizilýde.

Naýryzbaı aýdany Aqjar yqshamaýdanynda memlekettik tilde oqytatyn №194 balabaqshanyń ashylýy ótti.

Balabaqshanyń jobalyq qýaty 120 oryn. Sondaı-aq 40 jańa jumys orny quryldy.

Almaty qalasy Naýryzbaı aýdany «Taýsamaly» yqshamaýdanynda 40 jańa jumys ornyn qurýmen 120 balaǵa eseptelgen №193 jańa memlekettik balabaqsha ashyldy.

Almaty qalasynda mektepke deıingi bilim berý ǵımarattaryn salýǵa bos jer ýchaskeleriniń jetispeýinen, ákimdik jalpy bilim beretin mektepterdiń aýmaqtarynda jańa balabaqsha salý týraly sheshim qabyldady.

Bul balabaqshalardaǵy oryn jetispeýshiligi máselesin sheshýge, ár balaǵa úıdiń janyndaǵy mektepke barýǵa múmkindik beredi.

Naýryzbaı aýdany «Taýsamaly» yqshamaýdanynda №186 men №187 jalpy bilim beretin mektepterdiń aýmaǵynda árqaısysy 120 oryndy eki jańa balabaqsha ashyldy.

Túrksib aýdanynda memlekettik bilim berý boıynsha 68 balaǵa arnalǵan «Adel» jekemenshik balabaqshasy ashyldy.

«Biz jeke menshik balabaqshada balalarǵa bilim men tárbıe berýge memlekettik qoldaý aldyq. Balalardy eki jastan bastap qabyldaımyz. Bul orys balabaqshasy, biraq balalarǵa qazaq tilimen aǵylshyn tilderin de úıretemiz. Memlekettik baǵdarlamalardan basqa, bilim berý jobalary da bar», – dedi balabaqsha basshysy Larısa Lı.

Almaty qalasy Bostandyq aýdanynda taǵy bir «ALGABAS-3» jekemenshik balabaqshasy ashyldy. Atalǵan balabaqsha memlekettik tapsyrys boıynsha jumys isteıdi.

2021 jyldyń basynan beri Almatyda 1,7 myń oryndy 30-ǵa jýyq jekemenshik uıymdary ashyldy. Jyl sońyna deıin taǵy da 5 myń oryndy 35 jeke balabaqsha ashý josparda. Memlekettik tapsyrys 20 441 orynǵa 397 mektepke deıingi uıymǵa ornalastyryldy.