Almatyda Astana kúni keń kólemde atap ótiledi
ALMATY. QazAqparat - Astana kúni Almaty qalasynda búgin, 4 shildeden bastap toılana bastaıdy. Bul týraly Almaty qalasy ákiminiń baspasóz qyzmetinen habarlady.
Sonymen, búgin keshki saǵat 21:30-da Almatyda elimiz boıyna tuńǵysh ret túngi velojarys ótedi. Veloshabandozdar saǵat 21:00-de ál-Farabı dańǵyly men Táttimbet kóshesiniń qıylysyna jınalady. Jarys baǵyty tómendegideı: qatysýshylar ál-Farabı dańǵyly boıymen batysqa qaraı Syrǵabekov kóshesine deıin barady da, sol jerden keri burylyp, shyǵysqa qaraı jarysady. Sóıtip, «Suńqar» shańǵy tramplınderi kesheni mańynan máre syzyǵynan ótedi. Jeńimpazdardy baǵaly syılyqtar kútip tur.
Al 6 shilde kúni ońtústik astanada 15-shi qazaqstandyq «Nursultan-2014» alpınıadasy ótedi. Oǵan alpınıster men barlyq nıet bildirýshiler qatysa alady. Osylaısha almatylyqtar «Nursultan» shyńyn 15-shi ret baǵyndyraıyn dep otyr. Jeksenbi kúni tańǵy saǵat 04:00-ten bastap Dostyq dańǵyly men Qurmanǵazy kóshesiniń qıylysynan Medeýge qaraı tegin avtobýstar júre bastaıdy. Qatysýshylar Medeýden (1600 m) «Medeý-Shymbulaq» arqan jolymen Shymbulaqqa (2380 m) kóteriledi. Ári qaraı alpınıster Talǵar asýyna (3200 m), odan keıin Komsomol (4000 m) asýyna kóteriledi. Budan ári qaraı jartasqa órmeleý, ıaǵnı «Nursultan» shyńyna (4376 m) kóterilý bastalady. Qatysýshylarda tıisti kıim-keshek, kúnnen qorǵaıtyn kózáınek, taýǵa kıetin aıaq kıim jáne basqa da kerek-jaraqtar bolýy shart. Alpınıadaǵa qatysýshylar úshin taý-shańǵyly arqan joldarda júrý tegin. Shyńǵa shyǵý sharasy kúndizgi saǵat 14:00-ge deıin ǵana jalǵasady. Al negizgi merekelik shara sol kúni keshke saǵat 20:00-de Astana alańynda ótedi. Mundaǵy kontserttik baǵdarlamaǵa Baqyt Shadaeva men basqa da otandyq estrada juldyzdary jáne «Saryn», «Azııa», «Erke», «Djýnıors» jáne «JCS» toptary qatysady. Sonymen qatar Almatyda Astana kúnin merekeleý aıasynda turǵyn úı kezeginde turǵan áleýmettik álsiz sanattaǵy turǵyndarǵa - múgedekterge, zeınetkerlerge, sonymen qatar kóp balaly jáne tolyqqandy emes otbasylarǵa 100 páterdiń kilti tabys etiledi. Jalpy qalalyq mereke aıasynda barlyq demalys oryndarynda mádenı-oıyn saýyq sharalary ótedi. Qalanyń árbir aýdany óziniń merekelik baǵdarlamasyn júzege asyrady. Mereke 6 shilde kúni tańǵy saǵat 11:00-de barlyq aýdanda bir mezette bastalady. Onda kontsertter, sporttyq oıyndar, baıqaýlar, vıktorınalar, taqyryptyq fotokórmeler jáne basqa da qyzyqty sharalar ótedi.
