Almatyda áskerı tehnıkany jóndeıtin ortalyq iske qosyldy
«Bul – Qazaqstan Qarýly kúshteri tarıhyndaǵy oq atýdy basqarý júıesin, atys quraldaryn, kúsh qondyrǵysyn, júris bóligin jáne arnaıy elektr jabdyqtaryn qosa alǵanda, brondy tank tehnıkasy men zymyran-artıllerııalyq qarý-jaraqqa keshendi jóndeý júrgize alatyn alǵashqy tseh. Ony iske asyratyn qajetti qurylǵylary men óndiristik qýaty bar mamandandyrylǵan ýchaskeleri jáne tórt post bar», delingen habarlamada.
Tsehtyń qurylymyn jobalaý jáne qurý polkovnık Asylbek Satybaldınovtyń basshylyǵymen Tyl jáne qarý-jaraq bastyǵy basqarmasynyń bastamasymen jáne tikeleı qatysýymen oryndalǵan.
Atalǵan obektiniń aýmaǵy 900 sharshy metr. Ol Reseı, Germanııa jáne Qytaıdan ákelingen sońǵy úlgidegi dıagnostıkalyq, kótergish, dánekerleý, montajdaý jabdyqtarymen jabdyqtalǵan.
Qarýly kúshterdiń joǵary bilikti mamandary – áskerı bólimderde de, áskerı zaýyttarda da jan-jaqty jumys tájirıbesi bar áskerı qyzmetshiler men azamattyq personal jóndeý jumystaryn atqarady.
«Shtattyq áskerı bólimshelerdiń kúshimen jóndeý júrgizý eń aldymen joǵary jaýyngerlik ázirlikti qamtamasyz etýge múmkindik beredi. Tehnıka qysqa merzimde jedel túrde qalpyna keltiriledi. Mysaly, tankti jóndeý jumysynyń kúrdeli bolýyna baılanysty bizdiń mamandar ony 10-15 kúnde jóndeı alady. Sondaı-aq, bul bıýdjet qarajatyn aıtarlyqtaı únemdeıdi. Al zańnamaǵa engizilgen ózgerister qabyldanyp, Qorǵanys mınıstrligi qosalqy bólshekter men jıyntyqtardy óz betinshe satyp alady. Bul bizdiń jumysymyzdyń jyldamdatady», - dep túsindirdi Tyl jáne qarý-jaraq bastyǵy Asylbek Satybaldınov.
Qorǵanys mınıstri Nurlan Ermekbaev tsehty aralaý barysynda basqa óńirlerde de osyndaı «qyzmet kórsetý ortalyqtaryn» ashý máselesin pysyqtaý qajettigin atap ótti. Bul áskerı tehnıkanyń jaýyngerlik ázirligin qajetti deńgeıde ustaýdy qamtamasyz etedi, qarý-jaraqty jóndeıtin oryndarǵa tasymaldaýǵa ketetin ýaqyt pen shyǵyndy azaıtady.
Sondaı-aq qorǵanys vedomstvosynyń basshysy Tyl jáne qarý-jaraq basqarmasynyń sońǵy jyly júrgizgen aýqymdy jumysyn aıtty. Atap aıtqanda, áskerı qyzmetshiler úshin azyq-túlik úlesiniń qunyn arttyrý máselesi sheshildi. Áskerı nysandy jetildirý boıynsha jumystar júrgizilip jatyr. Uzaq jyldar ishinde alǵash ret áskerı múlikke tolyq túgendeý júrgizildi. Paıdalanylmaıtyn áskerı múlik odan túsken qarajatty ótkizý, sondaı-aq ony el bıýdjetine jiberý úshin ýákiletti organǵa beriledi.
