Almatyda áskerı ınstıtýttar kýrsanttary arasynda kir tasyn kóterý men qol kúresi boıynsha chempıonat ótti
ALMATY. 15 aqpan. QazAqparat /Ádilet Musahaev/ - Aqpannyń 9 men 13 aralyǵynda Almatydaǵy Armııashylardyń ortalyq sport klýby bazasynda kir tasyn kóterý men qol kúresi boıynsha Qarýly Kúshterdiń jekeleı-komandalyq chempıonaty ótti.
Jarys QR Qarýly Kúshteriniń 2011 jylǵy daıyndyq jospary men áskerı-qoldanbaly jáne oıyndyq sport túrlerinen Spartakıadanyń I reglamentine sáıkes uıymdastyryldy. Bul baıraqty básekede Qurlyq áskerleri Áskerı ınstıtýtynyń, Radıoelektronıka jáne baılanys áskerı ınjenerlik ınstıtýtynyń, Áýe qorǵanysy kúshteri áskerı ınstıtýtynyń, Áskerı-teńiz ınstıtýtynyń, Sh.Ýálıhanov atyndaǵy Kadet korpýsy men ІІM Іshki áskerleri áskerı ınstıtýttarynan jasaqtalǵan komandalar baq synasty.
Alǵashqy eki kúnde sportshylar kir tasyn kóterýden synǵa tústi. Bul dodada júldeli birinshi oryndy Qurlyq áskerleriniń Áskerı ınstıtýty ıelense, ekinshi orynǵa ІІM Іshki áskerleri áskerı ınstıtýty kóterildi. Úshinshi oryndy Radıoelektronıka jáne baılanys áskerı ınjenerlik ınstıtýty mise tutty.
Chempıonattyń sońǵy kúni áskerı sportshylar qol tiresýden synǵa tústi. Bul jarysta sál ǵana artyqshylyqpen Іshki áskerler áskerı ınstıtýtynyń komandasy jeńis tuǵyryna kóterile bildi. Al, Qurlyq áskerleriniń Áskerı ınstıtýty 2-oryndy alsa, Radıoelektronıka jáne baılanys áskerı ınjenerlik ınstıtýtynyń komandasy 3-orynnan kórindi.
Áskerı sportshylardy ulyqtaý rásimine Qazaqstan Respýblıkasy Kir sporty men armrestlıng federatsııasynyń prezıdenti Vladımır Dreksler qatysty. Ol áskerı oqý oryndary sportshylarynyń QR QK spartakıadasynyń sheńberinde budan ózge de ár túrli jarystarǵa qatysa alatyndyǵyn, olardyń ár qaısysy joǵary kórsetkishterge ıe bolyp, jeńimpaz atanatynyna senim bildirdi.
Jarys qorytyndylary boıynsha úzdik dep tabylǵan sportshylar TMD-nyń aldaǵy chempıonatyna qatysatyn Qazaqstan ulttyq quramasynyń negizin quraıtyn bolady.
