Almatyda áskerı ınstıtýt kýrsanty kópirden sekirmek bolǵan boıjetkendi qutqardy
ALMATY. QazAqparat – Almatyda áskerı qyzmetshiler polıtsııa jáne Ulttyq ulan ókilderimen birge karantınniń alǵashqy kúnderinen bastap baqylaý-ótkizý posttarynda qyzmet etýde, dep habarlaıdy QazAqparat tilshisi.
Qurlyq áskerleri Áskerı ınstıtýtynyń baspasóz qyzmetiniń málimetinshe, JOO tórtinshi kýrs kýrsanty Meırambek Naısekenov kezekshilik kezinde «Altyn Orda» mańynda ózine qol jumsaǵysy kelgen boıjetkendi qutqaryp qaldy.
«Qarańǵyda kópirden sekirmek bolǵan qyzdyń sulbasyn baıqap qalǵan kýrsant oılanbastan qutqarýǵa umtylady. Ol áıeldiń qolynan ustap, kópirdiń syrtqy tireýinen shyǵaryp, qaýipsiz jerge aparady. Keıin óziniń qolbasshysyna habar berip, qyzdy tynyshtandyrýǵa tyrysqan» - dep habarlaıdy oqý ornynyn baspasóz qyzmeti.
Belgili bolǵandaı, boıjetken mundaı qadamǵa jigitimen ursysyp qalǵandyqtan barǵan. Ol kýrsant Meırambek Naısekenovtiń batyl áreketiniń arqasynda aman qaldy.
