Almatyda áskerı gospıtal ınfektsııalyq statsıonarǵa aınaldy
Koronavırýs ınfektsııasymen aýyrǵandardyń kóbeıýine baılanysty Almaty qalasyndaǵy Qorǵanys mınıstrliginiń áskerı klınıkalyq gospıtali ınfektsııalyq statsıonarǵa aınaldy.
Statsıonar 150 naýqasqa arnalǵan, bul rette medıtsınalyq mekemede somatıkalyq patologııasy bar áskerı qyzmetshilerdi, sondaı-aq áskerı-dárigerlik jáne dárigerlik-ushqyshtar saraptamasyn júrgizý úshin 100 oryn saqtalady.
Qalyptasqan jaǵdaıda áskerı dárigerler azamattardy gospıtalǵa jatqyzý jáne bilikti medıtsınalyq kómek kórsetý úshin qolda bar resýrstardy jumyldyrdy.
– Bizdiń áskerı gospıtal ekinshi eshelonǵa jatady. Sondyqtan ınfektsııalyq statsıonarǵa ortasha aýyr jáne aýyr naýqastar jatqyzylatyn bolady. Jeke quram bul jaǵdaıǵa daıyn. Bizdiń medıtsınalyq personaldyń koronavırýstyq ınfektsııamen aýyratyn naýqastardy emdeý isinde tájirıbesi bar. Ol úshin bizde ÓJJ jáne gemodıalız apparattarymen jabdyqtalǵan reanımatsııa bólimshesi, sondaı-aq qajetti dári-dármek bar, – dep túsindirdi Almaty qalasyndaǵy Áskerı klınıkalyq gospıtal bastyǵynyń mindetin ýaqytsha atqarýshy medıtsına qyzmetiniń podpolkovnıgi Abdývalı Paltýshev.
2020 jylǵy sáýirden bastap azamattyq turǵyndarǵa kómek kórsetý úshin áskerı gospıtal dárigerleri eki ret tartylǵanyn esterińizge sala keteıik. Nátıjesinde 1 430 adam, onyń shamamen 30 %-i aýyr jáne asqynǵan deńgeıdegi patsıent emdelip shyqty.
Shildeden bastap elordadaǵy bas áskerı klınıkalyq gospıtal koronavırýspen naýqastanǵandardy emdeý úshin qaıta jumyldyrylǵanyn atap ótken jón.
Almaty, Taldyqorǵan jáne Úsharal qalalaryndaǵy úsh áskerı-emdeý mekemesi azamattyq turǵyndardy qabyldaýǵa daıyn. Aıagóz, Taldyqorǵan, Saryózek jáne Semeı áskerı gospıtaldarynda qosymsha tórt ınfektsııalyq oqshaýlaǵysh jumys isteıdi.
PTR-testileý úshin Nur-Sultanda jáne Almatyda eki statsıonarlyq zerthana, sondaı-aq Aqtaýda jáne Semeıde mobıldi zerthanalyq keshender jumys isteıdi.
