Almatyda Ashyq jobasyna qatysatyn kásipkerler sany 1,7 myńǵa jetti

ALMATY. QazAqparat - Almatyda Ashyq jobasyna qatysýshylar sany 1700-ge jetti. Bul týraly onlaın brıfıng barysynda qalalyq kásipkerler palatasynyń dırektory Aıtýar Qoshmambetov aıtty, dep habarlaıdy QazAqparat tilshisi.

Onyń málimetinshe, sáýir aıynda Ashyq júıesin 367 kásipker qoldansa, qazir olardyń sany 1700-ge jetken.

«Jobaǵa qatysýshylar tiziminde 128 fıtnes-ortalyq, 40 SPA-salon, 38 basseın, 5 boýlıng-klýb, 18 bılıard, 110 kompıýterlik klýb, 110 monsha, 1096 qoǵamdyq tamaqtaný nysany, 33 karaoke, 19 kınoteatr, teatrlar men kontsert zaldary bar», - dedi ol.

Sondaı-aq ol testilik rejımde 232 bıznes sýbektisi jumys istep jatqanyn jáne jobaǵa erikti túrde 44 nysan qatysýǵa nıet bildirgenin jetkizdi.

«Joba Kaspi.kz-pen birikti, endi siz mártebeńizdi bank qosymshasynda bile alasyz. Sondaı-aq kelesi kezeńde servısti Egov Mobile men Halyk bank-te jarııalaý josparlandy. Aldaǵy ýaqytta qamtylatyn qyzmet salasy týraly aıtatyn bolsaq, bul - barlyq áýejaılar, temirjol vokzaldary, fýdkort, JOO men basqalary», - dedi Aıtýar Qoshmambetov.