Almatyda «Ashyq» jobasyn qoldanatyn nysandarda buzýshylyqtar anyqtaldy

ALMATY. QazAqparat- «Ashyq» jobasy boıynsha jumystaryna ruqsat etilgen Almatynyń 16 mekemesinen monıtorıng toby buzýshylyqtar anyqtady, dep habarlaıdy QazAqparat tilshisi.

Tekserý nátıjesi kórsetkendeı, kompıýterlik klýbtarǵa, SPA, saýnalarǵa, monshalar men qonaq úılerge kelýshilerdi qosymshaǵa tirkeýsiz kirgizgen. Sonymen birge, bul nysandarda maska rejımi saqtalmaǵan.

Kásipkerlik nysandaryn tolyqtaı jappaýdyń balamasy retinde jáne shekteýlerdi ishinara alyp tastaý úshin «Ashyq» jobasy qosylǵan bolatyn. Alaıda kásipkerlerdiń bári birdeı joba talaptaryn laıyqty túrde oryndamaıdy.

«Kásip ıeleri QR-kodtardy tek sózben paıdalanýda, is júzinde tekserýshiler birqatar buzýshylyq anyqtady.Tekserilgen 44 nysannyń 16-sy sanıtarlyq talapty saqtamaǵan.

Atap aıtar bolsaq, LORD-GAME», «TANKER», «ERMAN» JK, «CLICKME», «ELEÝISOV» JK, «STRONG KIBERSPORT» JK kompıýterlik klýbtardyń, «EKVATOR», «Sokolova» saýnalarynyń, «KIT», «SAU BU», «EM BU SU» monshalarynyń, «AA PLUS» JShS SPA, «TOPSPIN» jattyǵý zalynyń, «ASIA THAISPA» SPA-ortalyqtary men fıtnes-klýbtardyń, «ABSOLUTE» qonaq úı kesheniniń, «GABER» bılıard klýbynyń ıeleri jol bergen.

Karantın sharalaryn buzýshylarǵa qatysty ákimshilik hattamalar toltyryldy, mekemelerdiń ıelerimen «Ashyq» jobasy boıynsha jumys talaptaryn saqtaý jóninde áńgimelesýler júrgizildi.

«Ashyq» qosymshasynyń mártebeni bildiretin túsi kelýshiniń mekemege kiretin-kirmeıtinine sáıkes keledi. «Jasyl» tús adamnyń COVID-19-ǵa tapsyrǵan PTR test nátıjesiniń teris ekendigin, «kók» - adamda PTR nátıjesiniń joq ekendigin, alaıda onyń naýqaspen baılanys jasamaǵanyn, «sary» - bazada naýqaspen baılanys jasaýshy retinde shyqsa, «qyzyl» - onyń bazada PTR nátıjesiniń oń shyqqan adam retinde tirkelgenin bildiredi.

Almaty ákimdigi kásipkerlerdi bul jobaǵa baıypty qaraýǵa, karantındi buzbaýǵa, kelýshilerden saqtyq sharalaryn saqtaýdy suraýǵa shaqyrady.