Almatyda «Ashyq» arqyly «qyzyl» mártebesi bar 5515 adam anyqtaldy

ALMATY. QazAqparat- Almatyda Ashyq jobasynyń arqasynda «qyzyl» mártebesi bar 5500-den astam turǵyn anyqtaldy. Mundaı derekti qalalyq kásipkerler palatasynyń dırektory Aıtýar Qoshmambetov onlaın brıfıng barysynda keltirdi, dep habarlaıdy QazAqparat tilshisi.

Almaty qalasy kásipkerler palatasynyń dırektory bul joba sanıtarlyq-epıdemıologııalyq qaýipsizdik máselelerinde óziniń tıimdiligin kórsetetinin atap ótti. Almaty qalasy sanıtarlyq-epıdemıologııalyq baqylaý departamentiniń málimetteri boıynsha 2021 jyldyń 9 sáýirinen 17 tamyzyna deıin skanerleý nátıjesinde 5515 turǵynnyń «qyzyl», «sary» - 735 mártebesi rastaldy.

«Jalpy alǵanda, Ashyq jobasyna qatysýshylardy keńinen qamtýdyń arqasynda ózin-ózi oqshaýlaý rejımin buzýshylardy anyqtaý kórsetkishi 15 esege ósti. Kún saıyn respýblıka boıynsha «qyzyl» mártebesi bar 2000-nan astam kelýshi anyqtalady», – dedi Aıtýar Qoshmambetov.

Aıta keteıik, «qyzyl» mártebe júrip-turýdyń shektelgenin, úı jaǵdaıynda oqshaýlaý rejımin qatań saqtaý qajettigin bildiredi. Mundaı mártebesi barlar ambýlatorııalyq baqylaýda bolady. Osy mártebesi bar adam anyqtalǵan jaǵdaıda tıisti baqylaý organdary ákimshilik jaýapqa tartyp, aıyppul salýǵa quqyǵy bar.

«Shekteý jáne karantındik sharalardy buzǵan jobaǵa qatysýshylarǵa ákimshilik shara qoldanylyp jatyr. Almaty qalasynda «qyzyl» mártebesi bar 870 adamǵa jeke oqshaýlaý rejımin buzǵany úshin 30 AEK mólsherinde aıyppul salyndy», – dedi spıker.