Almatyda ashylǵan saýda, oıyn-saýyq ortalyqtary qalaı jumys isteýde
ALMATY. QazAqparat – Almatyda 25 mamyrdan bastap saýda úıleri, oıyn-saýyq ortalyqtary, dámhanalar men basqa da nysandar ashyldy. QazAqparat tilshisi koronavırýs ınfektsııasyna baılanysty 2 aıdan asa ýaqyt jabyq turǵan saýda oryndaryn aralap kórdi.
«Mega» saýda, oıyn-saýyq ortalyǵynda dezınfektsııalyq tonnel ornatylǵan. Kelýshilerdiń barlyǵynyń dene qyzýy tekserilip jatyr. Sanıtaızerler men antıseptıkter ornatylǵan. Saýda ortalyǵy aımaǵynda arnaıy mamandar zararsyzdandyrý sharalaryn júrgizýde. Aıaq attaǵan saıyn 2 metr qashyqtyqty saqtaý týraly eskertpeler ilingen. Satýshylar men qyzmetkerler, kelýshiler maska taǵyp júr.
«Grand park» saýda, oıyn-saýyq ortalyǵyna kireberiste kezek paıda bolǵan. Adamdar munda kirý úshin tańǵy 8-den kelgen. Esik aýzynda dene qyzýy ólshenedi. Kúzetshiler adamdardy bir jerge shoǵyrlanbaýdy ótinip jatyr.
Keıbir býtıkter ashylmaı jatyp, ishi adamǵa toly.
Qala ákimdigi 25 mamyrdan bastap saýda ortalyqtary men saýda, oıyn-saýyq keshenderi terrıtorııasynda ornalasqan azyq-túliktik emes saýda núkteleri, hımııalyq tazalaý ortalyqtary, meıramhanalar, sulýlyq salondary ashylatynyn habarlaǵan bolatyn.
Saýda, oıyn-saýyq ortalyqtary keshki 22:00 deıin ashyq bolady. Osy ortalyqtarda ornalasqan tamaqtaný oryndarykelesi – ekinshi kezeń aıasynda ashylmaq. Al SPA salondar, fıtnes-klýbtar, oıyn-saýyq nysandary – úshinshi kezeńde ashylady.
Munyń aldynda qalanyń bas sanıtarlyq dárigeri Jandarbek Bekshın iri nysandarǵa dezınfektsııalyq tonnel, statsıonarlyq teplovızor ornatýǵa keńes bergen bolatyn.
Sonymen qatar, qalada qoǵamdyq tamaqtaný oryndary, meıramhanalar, dámhanalar ashyla bastady. Alaıda, bul jerlerde banket, toı ótkizýge tyıym salynǵan.
Qalalyq polıtsııa turǵyndardyń karantın talaptaryn oryndamaı ketkenin eskertti.
Osy maqsatta túsindirý jumystary artyp, blokpostardaǵy polıtsııa baqylaýy kúsheıtildi.
