Almatyda ashylǵan nysandarda sanıtarlyq talaptardyń buzýshylyqtary anyqtaldy
ALMATY. QazAqparat – Almatyda ashylǵan nysandarda sanıtarlyq normalardyń birqatar buzýshylyqtary anyqtaldy, dep habarlaıdy QazAqparat tilshisi.
Ákimdik, polıtsııa departamenti, SES jáne «Atameken» kásipkerler palatasynyń ókilderinen turatyn arnaıy jumys toby sulýlyq salondary, iri azyq-túlik satatyn bazarlar, sýpermarketter men tehnıka dúkenderin tekserdi.
Tekserý kezinde komıssııa sanıtaızerler men teplovızorlarǵa nazar aýdardy. Sonymen qatar, kelýshiler men satýshylardyń jeke qorǵanys quraldarymen qamtamasyz etilýin qadaǵalady ( maska, qolǵap). Qashyqtyqty saqtaıtyn arnaıy belgilerdiń ornatylýyn tekserdi.
Reıd barysynda sanıtarlyq talaptardy oryndamaǵandar kóptep kezdesti. Máselen,ortalyq ámbebap dúkende satýshylar qolǵapsyz jumys istedi, kireberiske sanıtaızer men teplovızor ornatylmaǵan. Sórelerde qaptalmaǵan nan ónimderi boldy.
Dál osyndaı kórinisti «Kók bazardan» da baıqaýǵa bolady. Munda da sanıtarlyq talaptar saqtalmaǵan.
«Barlyǵyn tezdetip retke keltirýlerińizdi suraımyn. Munda bir jaqty qozǵalys bolýy kerek. Adamdar toptalyp jınalyp qalmaýy tıis. Áleýmettik qashyqtyqty saqtańyzdar. Dezınfektsııalyq týnnelder ornatylýy kerek. Teplovızorlaryńyz isten shyqqan. Rezervte basqasy bolýy shart. Men muny óreskel buzýshylyq dep sanaımyn», - dedi qalanyń bas memlekettik sanıtarlyq dárigeri Jandarbek Bekshın.
Sonymen qatar, komıssııa músheleri kelýshiler ǵımaratqa kirgen kezde antıseptıkterdi qoldanýy kerektigin aıtty. Al kúzet osynyń bárin qadaǵalap, eskertip otyrýy qajet.
Al sulýlyq salondaryndaǵy qyzmetkerler sanıtarlyq talaptarmen tolyq tanys bolmaı shyqty.
«Qyzmetkerler maskalardy qanshalyqty jıi aýystyrý kerektigin bilmeıdi, ár 20 mınýt saıyn deıdi. Іs júzinde ár 2-3 saǵat saıyn aýystyrý kerek. Olar sondaı-aq aýyz ben muryndy tolyǵymen jabýy qajet. Sheberler arasyndaǵy qashyqtyq 1,5-2 metr bolýy tıis», - dep túsindirdi qalanyń bas sanıtar dárigeri sulýlyq salonynyń ákimshisine.
Jandarbek Bekshınniń aıtýynsha, anyqtalǵan kemshilikter boıynsha hattamalar toltyrylady.
«Anyqtalǵan buzýshylyqtar, eskertýler men kemshilikter negizinde aýdandyq bas sanıtar dárigeri hattama toltyrady. Sonymen qatar, biz kórsetken kemshilikterdi joıý tapsyryldy. Aıyppuldyń mólsheri tórt mıllıon teńgege jetedi. Túrli jeńildikter bar, eger aıyppul bir apta ishinde tólense, onda onyń mólsheri 50% deıin qysqarady. Munyń bári bıznestiń qaı kategorııaǵa jatatynyna baılanysty»,– dedi Bekshın.
Onyń aıtýynsha, monıtorıng toby tek qalada ǵana emes, aýdandyq ákimdikterde de qurylǵan. Búgingi tańda 3000-nan astam nysan tekserildi, 91 obekti boıynsha óreskel zań buzýshylyqtar anyqtalyp, ákimshilik aıyppuldar salyndy.
Buǵan deıin, Almaty qoǵamdyq kólikterde reıdter júrgiziletini týraly habarlaǵan bolatynbyz.
