Almatyda ashyq júrekke krıoablıatsııa operatsııasy jasaldy
ALMATY. QazAqparat - Kardıologııa jáne ishki aýrýlar ǵylymı-zertteý ınstıtýtynda birden eki aýrýdy - júrek yrǵaǵynyń buzylýlaryn jáne júrektiń kemistigin emdeýge baǵyttalǵan ashyq júrekke krıoablıatsııa operatsııasy jasaldy, dep habarlaıdy QazAqparat tilshisi.
Krıoablıatsııa búginde tek qana Kardıologııa jáne ishki aýrýlar ǴZI-da jasalady.
Operatsııa ústelindegi kezekti patsıent 64 jastaǵy áıel, ol aldaǵy jańa jylda ádettegi qalypty ómirine orala alady – tolyqtaı ońaltý bir aıǵa jýyq ýaqytty alady.
Jasandy qanaınalym zerthanasy men operatsııa blogy bar kardıohırýrgııa bólimshesiniń meńgerýshisi Rústem Tóleýtaevtyń aıtýynsha, krıoablıatsııa – zamanaýı jáne senimdi tehnologııalardyń biri.
«Júrektiń qaqpaqshalyq kemistiginiń saldarynan kóbine júrek yrǵaǵy buzylady. Búgingi tańda biz júrek yrǵaǵynyń buzylysyn emdeý úshin jańa tehnologııa – krıoablatsııany paıdalanamyz. Buǵan deıin jylý energııasyn paıdalansaq, búginde – medıtsınalyq azotpen sýyq energııany paıdalanamyz. Bizde osyndaı operatsııalar jasaýdyń tájirıbesi bar jáne olardyń qandaı jaqsy nátıje beretinin kórip otyrmyz, al aralasýdan keıin patsıentte turaqty yrǵaq qalyptasyp, saqtalady», – deıdi dáriger.
Krıoablıatsııa jasaý úshin kórsetkishterge paroksızmaldy nemese turaqty nysandaǵy bolsyn, júrektiń qaqpaqshaly kemistigi men yrǵaǵynyń buzylýy jatady. Qarsy kórsetkishter joq – tipti tromb bolǵan jaǵdaıda hırýrgtar aralasady da, ony alyp tastaıdy.
Sonymen birge, krıoablıatsııa tromboembolııalyq asqynýlar men ınsýlttardyń aldyn alýǵa kómektesedi, bul dárigerdiń pikirinshe, ınsýltterdiń shamamen 80%-y júrek yrǵaǵynyń buzylýy sebebinen bolady.
Operatsııa 4-5 saǵatqa sozylady. Qazaqstandyqtarǵa Medıtsınalyq saqtandyrý qory esebinen operatsııa tegin jasalatynyn aıta ketý kerek.
«Barlyq em-sharalardy biz bir operatsııa kezinde jasaımyz, osydan keıin patsıenttiń júrek yrǵaǵy qalpyna kelip, jyldam saýyǵyp, operatsııanyń áserin erte sezinedi. Óıtkeni júrek durys jıyryla bastaǵandyqtan, ári qaraı júrek tininde qosymsha qaıtalama ózgerister bolmaıdy», – dep túsindirdi Rústem Tóleýtaev.
Dárigerdiń aıtýynsha, aldyńǵy hırýrgııalyq aralasýlar tıisti nátıjeler bermeı, sodan keıin patsıentke krıoablatsııa jasalyp, jaqsy nátıjeler bolǵan.
Krıoablatsııa patsıentke qaı ádis saı kelýine baılanysty standartty ádis – ashyq júrekte de, sonymen qatar az ınvazıvti ádispen de iske asyrylýy múmkin.
Bul jaǵdaıda 64 jastaǵy patsıentke laparoskopııamen operatsııa jasaý múmkin bolmady deıdi dárigerler. Ońaltý sharasy meılinshe qysqa ýaqytty alady.
«Osylaısha, erte ońaltý kezeńi bir apta ishinde ótedi, al bir aıdan keıin patsıent klınıkaǵa ońaltýdyń ekinshi kezeńine qaıtyp keledi. Oń nátıjesi bir aıdan keıin-aq biline bastaıdy, ıaǵnı naýqastyń ál-aýqaty jaqsaryp jáne dárigerge keletindeı sımptomdary bolmaıdy. Osyǵan kóńil aýdarý qajet. Eger adam entigý, sharshaý, júrektiń aýyrýy men isiný sekildi belgilerdi baıqaıtyn bolsa, saq bolýy tıis», – deıdi dáriger.
Onyń aıtýynsha, sımptomdardyń paıda bolýyn kútýge bolmaıdy, profılaktıka úshin jyl saıynǵy skrınıngten ótý kerek, ol aýyrý paıda bolatyn bolsa erte anyqtaýǵa múmkindik beredi. Aýrý qanshalyqty erte anyqtalsa, ony emdeý sonshalyqty jeńil bolady.
