Almatyda ashýlanǵan júrgizýshi avtobýstaǵy jolaýshylardy jol ortada túsirip ketken
ALMATY. QazAqparat - Almatyda keıbir qalalyq marshrýttardyń «Ońaı» júıesi istemeı tur. Jolaýshylar qaltasynan qolma-qol aqsha tóleýge májbúr bolyp jatyr, dep habarlaıdy QazAqparat tilshisi.
Júıedegi aqaýdyń sebebinen jolaýshylar men avtobýs júrgizýshileri, kondýktorlar arasynda daý-janjal týyndaǵan.
Osyndaı oqıǵalardyń biri №65 marshrýt avtobýsynda boldy. Talǵar tas jolymen qalaǵa baǵyt alǵan avtobýs júrgizýshisi shý shyǵarǵan jolaýshylardy túgel túsirip tastap, ary qaraı qyzmet kórsetýden bas tartty.
«Men termınal istemese tegin júremiz ǵoı dep aıtyp edim, júrgizýshi maǵan dúrse qoıa berdi. «Ne boldy sonsha, 80 teńgege bola qınalyp. Júresiń be júr, júrmeısiń be tús» dedi aıǵaılap. Men «túspeımin» dedim. Soǵan ashýlanyp, alty atamnan boqtap, barlyq jolaýshyny túsirip tastady. Ary qaraı júrmeımin dedi. Men «Ońaı» qyzmet kórsetý ortalyǵyna shaǵym túsirýge májbúrmin», - dedi jolaýshy Gúlnar Dıarova.
Ońaı call-ortalyǵynyń operatory qyzmet kórsetýden bas tartqan avtobýs júrgizýshisine qatysty túsinikteme berdi.
«Shynymen de tańerteń №65, 26 marshýt avtobýstarynda osyndaı oqıǵalar boldy. Tańerteńnen beri «Ońaı» júıesiniń call-ortalyǵyna qońyraýlar kóptep túsip jatyr.
Jolaýshylar tarapynan narazylyq bildirgender kóp. Tehnıkalyq aqaýdyń sebepteri tekserilip jatyr. Qyzmet kórsetýden bas tartqan avtobýs júrgizýshilerine qatysty shaǵym da 15 kún ishinde qaralady», - dedi cool-ortalyǵynyń operatory.
Almaty kólik holdıngi JShS baspasóz hatshysy Altaı Sandybaev tehnıkalyq aqaý bolǵanyn rastady.
«Ońaı júıesindegi aqaý boıynsha birneshe derek tirkeldi. Qazir arnaıy qyzmet kórsetý brıgadalary marshrýttarǵa shyqty. Qazir qansha marshrýtta, qandaı tasymaldaýshynyń lınııasynda aqaý bolǵany tekserilip jatyr. Tehnıkalyq aqaýdyń birneshe sebebi bolýy múmkin. Avtobýstaǵy elektr symynda aqaý bolýy múmkin, málimetter jetkizý júıesi isten shyǵýy múmkin. Barlyq sebepter tekserilip jatyr», - dedi Altaı Sandybaev.
