Almatyda asfalt opyrylyp, júk kóligi shuńqyrǵa túsip ketti

ALMATY. QazAqparat- Almatynyń Túrksib aýdanynda asfalt opyrylyp, Kamaz shuńqyrǵa túsip ketti, dep habarlaıdy QazAqparat tilshisi.

Onyń vıdeosy áleýmettik jelide tarady.

«Túrksib aýdany, «Maıak» yqsham aýdany, Topchıev kóshesinde asfalt opyrylyp jatyr. Shuńqyr kún saıyn úlkeıip barady. Qazirdiń ózinde tereń», - dep jazdy jeli qoldanýshy. Túrksib aýdanynyń ákimdiginiń málimetinshe, Topchıev kóshesinde asfalttaǵy shuńqyrdy jabý jumystary júrgizilýde.

«Kóktemde asfalt jamylǵysy qalpyna keltiriledi. Sondaı-aq «Maıak» shaǵyn aýdanynda ekinshi toqsanda sýmen jabdyqtaý jelilerin kúrdeli jóndeýden ótkizý josparlanýda. Osydan keıin jol jabyny tolyǵymen jóndeledi», - dep jaýap berdi aýdan ákimdiginiń ókilderi.