Almatyda «Ásem kıim - áıel kórki» respýblıkalyq baıqaýynyń jeńimpazdary anyqtaldy
MATY. 24 qazan. QazAqparat /Názıra Eleýhan/ - Almatyda keshe Balýan Sholaq atyndaǵy sport kesheninde musylman qyz-kelinshekterge arnalǵan, ulttyq aıshyqtaǵy zamanaýı kıim úlgilerine jarııalanǵan respýblıkalyq «Ásem kıim - áıel kórki-2011» baıqaýynyń qorytyndy keshi bolyp ótti.
Keshke ıisi musylman jamaǵat kóp jınaldy, keshenniń ishinde ıne shanshar jer bolmady. Sharany elimizdiń Bas múftıi, haziret Ábsattar qajy Derbisáli ashyp, baıqaýdyń mán-mańyzy jaıly qysqasha baıandama jasady.
«Ulttyq aıshyqtaǵy zamanaýı kıim úlgilerin tiktirý arqyly tek musylmanshylyqqa bet burǵan qyzdardyń máseleleri sheshilip qana qoımaıdy. Sonymen birge qazaqylyǵymyzdy nasıhattaýǵa, nyǵaıtýǵa úlken múmkindik bolady. Bul arqyly eń áýeli biz qyzdarymyzdy qazir jahandy jaılap jatqan jalańashtaný saıasatynan saqtap qalamyz. Ulttyǵymyzdy saqtap qalýdyń bir joly - ulttyq kıimderimizdi keńinen nasıhattaý. Tek nasıhattaý emes, ony kúndelikti ómirde kıip júrý. Dinı basqarmanyń qolǵa alyp otyrǵan isi keshegi joǵaltqan qundylyqtardy qaıta jandandyrýdyń, musylmandyq paryzymyzdy oryndaýdyń áreketi. Osy shara arqyly ımanyn oılaǵan aıaýly qara kózderdiń kıim jaıly máselelerin sheshýge úles qosqan bolsaq, maqsatymyzdyń oryndalǵany», - dedi Bas múftı sharanyń ashylýynda.
Esterińizge sala ketsek, respýblıkalyq baıqaý bıyl Qazaqstan musylmandary Dinı basqarmasynyń bastamasymen eki aı buryn bastalǵan bolatyn. Oǵan elimizdiń sán sheberleri, dızaınerler, tanymal sán úıleri qatysty. Talap boıynsha, baıqaýǵa musylman qyz-kelinshekterge arnalǵan sharıǵat talabyna saı, qazaqy naqyshtarmen árlengen, qoǵamdyq oryndarda kúndelikti kıip júrýge jeńil, ári yńǵaıly kıimder qatystyryldy. Bas júldege - 750 000 teńge, І orynǵa - 500 000, ІІ orynǵa - 400 000, ІІІ orynǵa - 300 000 tigilgen bolatyn. Bunymen qatar, uıymdastyrýshylar 150 000 teńgeden bes adamǵa yntalandyrý syılyqtaryn jarııalaǵan edi.
Sarapshylardyń aıtýynsha, baıqaýǵa kórikti de, kelisti, sharıǵatymyzǵa da, zamanymyzǵa da saı, kıip júrýge de yńǵaıly 70-ten asa kıim úlgileri kelip túsken.
Qazylar alqasynyń ortaq sheshimi boıynsha, sonymen, alǵash ret uıymdastyrylǵan baıqaýdyń Bas júldesine «Erke-Nur» sán úıiniń kıim úlgileri laıyq dep tanyldy. Onyń prezıdenti Farıda Merhamıtqyzyna elimizdiń Bas múftıi Ábsattar qajy Derbisáli bas báıgeniń - 750 myń teńge júldesi men arnaıy daıyndalǵan syı-syıapattardy tabystady.
І-oryndy jas dızaıner Gúljan Rysbekova jeńip aldy. ІІ-oryndy «Symbat» sán akademııasynyń stýdenti Zýlfııa Aqataeva men «Altyn Arqaý» mádenı-etnografııalyq birlestiginiń tóraıymy Ǵalııa Qaıdaýylqyzy ózara bólisti. ІІІ-oryndy elimizdiń sán sheberleri - Maıra Ahmetova, Toǵjan Rymbaeva jáne Nazgúl Semǵalıeva jeńip aldy. Bunymen qatar, baıqaýǵa qatysqan bes dızaıner - Aısha Keńesbaı, Dınara Parmanova, Indıra Bırtýbaeva, Dosjan Gúlqaısha, Fatıma Bızaqova yntalandyrý syılyqtaryna ıe boldy. Barlyq jeńimpazdarǵa aqshalaı syılyqtarmen qatar, demeýshilerdiń arnaıy syılyqtary tabystaldy.
Keshte Eskendir Hasanǵalıev, Jáken Omarov, Serjanáli Álibek syndy Qazaqstan estradasynyń ánshileri, «KZ» jáne «Melomen» toptary óner kórsetip, dinı ánder oryndady.
Baıqaý - «Meıirimdilik joly - 2010» qoǵamdyq qorynyń bas demeýshiligimen ótkizildi.
