Almatyda asbesti paıdalanýdaǵy qaýipsizdik jaıyn qarastyrǵan semınar ótti
ALMATY. Mamyrdyń 11-i. QazAqparat /Ádilet Musahaev/ - Búgin Almatyda Eýropalyq Keńestiń qarjylandyrýyndaǵy jospar aıasynda «Qazaqstanda asbesti jáne quramynda asbest bar zattardy paıdalanýda qaýipsizdikti basqarý men táýekeldi azaıtý» taqyrybynda semınar ótti.
«QR Ekoforým» ÚEU múshesi Qaısha Atahanovanyń aıtýynsha, Eýropa men taǵy basqa damyǵan elder asbestti adam ómirine zııandy dep taýyp, ony paıdalanýdan bas tartqan. «Qazirgi ýaqytta bizge álemdik tájirıbelerge kóz júgirte otyryp sheshimder qabyldaǵan jón. Asbestiń paıdasy men zııany jaıyn saralaı otyryp, jurtshylyqty durys aqparatttandyrýymyz kerek. Bizde qazir asbesti paıdalanýǵa bolmaıdy degen zań joq, degenmen halyq onyń zııandy ekenin bilýi kerek», deıdi Q.Atahanova.
Jıyn barysynda sarapshylar jáne ekologtar asbestiń adam ómirine tıgizer zııany men asbesti zattardyń qaldyqtaryn qaıda saqtaý kerek degen másele tóńireginde sóz qozǵap, pikirlerin bildirdi.
Olardyń aıtýynsha, asbest talshyqtaryn kóp jyldar boıy jutý asbestoz, ókpe talshyqtarynyń búlinýi, ókpeniń qaterli isigi, mezoteolıma sııaqty aýrýlarǵa ákep soǵady.
Sonymen qatar Q.Atahanova mektep pen balalarǵa arnalǵan mekemeler ǵımaratynyń qurylysynda asbest bar materıaldar qoldanylǵanda olardy kesý, tasymaldaý kezinde qatań baqylap, tıisti sharalar qabyldap otyrý kerektigin aıtty.
