Almatyda Asanbaı Asqarovtyń 90 jyldyǵyna arnalǵan konferentsııa ótedi

Ol esimi respýblıka ǵana emes, kúlli TMD elderine  belgili kórnekti memleket jáne qoǵam qaıratkeri, jazýshy, ǵalym Asanbaı Asqarovtyń týǵanyna 90 jyl tolýyna arnalyp otyr. 

1922 jyly ómirge kelip, 2001 jyly 79 jasynda baqılyq bolǵan ol eńbek jolyn mektep muǵalimi bop bastap, túrli salalarǵa basshylyq qyzmet jasap, respýblıkanyń ósip-órkendeýine ólsheýsiz zor úles qosty.  Atap aıtqanda 1965-1978 jyldary ol Almaty oblysyna basshylyq jasaǵan kezde  68 sharýashylyq, eki selolyq, eki qalalyq aýdan qurdy. Almatyda temir jol transporty ınjenerleri ınstıtýty, Almaty qurylys-sáýlet, Energetıka ınstıtýttary ashylyp, Qonaevtyń basshylyǵymen Qapshaǵaı sý qoımasy salyndy. Almatyda Á.Jankeldın, O.Jandosov eskertkishteri, Panfılov parkindegi Dańq memorıaly ashyldy, munyń bári A.Asqarovtyń ıdeıalary boıynsha  iske asyrylǵan edi. A.Asqarov qaı jerde istese de, sol aımaqty qulpyrtyp, jaınatyp jiberýge, halyqtyń jaǵdaıyn múmkindiginshe jaqsartýǵa bar kúsh-jigerin jumsady.  1978 jyly Shymkent obkomyna І hatshy bolyp saılanysymen ońtústik óńiriniń óndirisin, aýyl sharýashylyǵyn, ásirese maqta  sharýashylyǵyn, qala qurylysyn damytýdy myqtap qolǵa aldy. Shymkent qalasynda halyqtyń demalýy úshin qoqys jınalyp kelgen 140 ga jerdi dendrobaqqa aınaldyryp, bıýdjetten bir tıyn da almaı, birde-bir oblysta joq zoopark, balalar temir jolyn, ıppodrom saldyrdy.  Alaıda qaıta qurý kezeńi bastalǵanda «Jeltoqsan» oqıǵasynyń uıymdastyrýshysy degen jalǵan aıyp taǵylyp, 4,5  jyl ádiletsiz tar qapasta tergeýde otyrdy. Keıin aqtalyp shyqqan soń, qoǵamdyq jumysqa qaıtadan belsene atsalysyp, shyǵarmashylyq jumyspen aınalysty. Máselen, «Taǵdyr» ádebı-memýarlyq romanyn, «Kózqaras» ádebı-tarıhı essesin, «Uly Turannyń uldary» ádebı-tarıhı, tanymdyq kitabyn, «Jumaq pen tozaq» jyrlar jınaǵyn jaryqqa shyǵardy. M.H.Dýlatı qoǵamdyq qoryna basshylyq etip, onyń muralarynyń halyqqa jetýine uıytqy boldy.