Almatyda asa iri kólemde esirtki tárkilendi

Ol Jambyl oblysynyń Shý óńirinen birazdan beri esirtki tasyp, paıda taýyp kelgen. Al bul joly ol alty qytaı sómkesine lyqa tolǵan esirtkini túndeletip qalaǵa ákelgen. Satý aldynda kóknárdi keptirip alý úshin ol, Bostandyq aýdanyndaǵy Vahtangov kóshesindegi jer úılerdiń biriniń jertólesin paıdalanǵan.

«Biz esirtkiniń qalamyzǵa qandaı joldarmen ákelingendigin tolyǵymen anyqtadyq. Jertólege jasyrylǵan taýardy Aleksandar tún ishinde túgelimen kóterme saýdada satyp jibermekshi nıette bolǵan. Alaıda qylmysker oqıǵa ornynda qolǵa tústi. Taǵaıyndalǵan sot-hımııalyq saraptamasy esirtkiniń 118 keli 950 gramdy quraıtyn kóknár ekendigin anyqtady. Bul zań boıynsha asa iri kólemdi quraıdy», - dedi Almaty qalasy ІІD Esirtkige qarsy kúres basqarmasynyń bastyǵy, polıtsııa podpolkovnıgi Denıs Loskýtov.

Onyń aıtýynsha, qolǵa túsken kúdikti buǵan deıin qylmystyq jaýapkershilikke tartylǵan. Qartaıǵan ata-anasymen birge turatyn ol, qylmystyq jolmen tapqan paıdasyn januıasynan jasyryp kelgen.

«Bizdiń tarapymyzdan júrgizilgen jedel-izdestirý sharalary qylmyskerdiń kópten beri osy kásippen aınalysyp kelgendigin áshkerelep berdi. Al bul degenimiz - onyń qalada kóterme baǵamen satyp alatyn basqa da sybaılastarynyń bar ekendigin kórsetip otyr. Qylmystyq isti júrgizý barysynda onyń qylmysyn dáleldeıtin barlyq aıǵaq zattar jınaqtaldy. Qazirgi tańda Bostandyq aýdandyq ІІB onyń ústinen QR QK-niń 259 babynyń 4-tarmaǵy boıynsha qylmystyq is qozǵady. Aıyptalýshy óz kinásin tolyǵymen moıyndap otyr», - dedi D.Loskýtov.